Mga hugawan nga manindahay sa Tabunok, dili ma-renew

CEBU, Philippines — Dili na makabaligya ang mga hugawan nga manindahay sa Tabunok Public Market sa Dakbayan sa Talisay kon sila masakpan nga padayong dili musunod sa mga lagda aron masiguro nga limpyo ang ilang mga produkto nga gibaligya.

Si Dr. Mary Thessa Lorrain Alo, city veterinarian sa siyudad nagkanayon nga nagsige na sila og tigum uban sa mga manindahay ingon man mga kawani sa administrador sa maong merkado labot sa pagpabilin nga limpyo og luwas ang mga produkto.

Gawas niini, ila na sab nga gihinabi ang mga negosyante nga dili gyud mogamit og color enhancing lights nga makapailad sa kunsomidor. Siya nagkanayon nga anaa na silay lista sa mga mituman ug wala sa maong polisiya.

Samtang si Winefredo Bas, ang market administrator miingon nga sa ilang tigum, mihatag siya og suhestiyon nga maghimo sila og composite team nga mosusi sa mga badlungon nga negosyante. Kini aron masiguro nga mapugngan ang ilegal nga kalihukan sa merkado.

Matud niya nga kinahanglan nga matagad kini ilabi na karong panahona nga daghang mangumpra.

Lakip nilang nasabutan nga inig renew sa mga manindahay, dili sila mahatagan og pagtugot nga makapadayon og baligya kon walay pirma sa city veterinarian. – DILT, (BANAT NEWS)