Kong. Gullas makigkita ni Abrugena
CEBU, Philippines – Gipasalamatan ni Kongresista Gerald Anthony “Samsam” Gullas, Jr. sa unang distrito sa Probinsiya sa Sugbo ang direktor sa Cebu Provincial Police Office (CPPO) nga si Senior Superintendent Manuel Abrugena.
Kini human gipasabot ni Abrugena ang nigawas nga balita labot sa opisyales sa Talisay nga giingong nalambigit sa ginadiling drugas nga dili tinuod ug na-misquote lang siya niini.
Sayo pa, si Gullas nihangyo sa kapolisan nga hinganlan ang mga opisyal nga naa sa ilegal nga drugas aron usab sila dili maduhigan.
Matud ni Abrugena nga wala siya magtumbok og lugar o sa Dakbayan sa Talisay nga dunay opisyales nga nalambigit sa ilegal nga drugas.
Dugang ni Gullas nga iyang pakigkitaan si Abrugena aron hisgutan ang ubang mga pamaagi nga matabang sa Talisay sa pakigbatok sa ginadiling drugas.
Sa laing bahin, nikunhod ang gidaghanon sa mga barangay sa Probinsiya sa Sugbo kinsa apektado sa ilegal nga drugas.
Matud sa Cebu Provincial Anti-drug Abuse Office (CPADAO) nga base sa consolidated nga datos sa Philippine Drug Enforcement Agency (PDEA) ug Philippine National Police (PNP) ug CPADAO, 810 ka barangay o 76.64% sa 1,066 ka barangay sa probinsiya ang apektado sa illegal nga drugas.
Sa maong datos, 14 niini ang “seriously affected”; 403 ang moderately affected ug 393 ang slightly affected, base kini sa classification nga gi-set sa Dangerous Drugs Board (DDB).
Matud ni Carmen Remedios “Ivy” Durano-Meca, pangulo sa CPADAO nga nikunhod ang apektadong barangay sukad niadtong tuig 2016 nga niabot sa 90% ang apektado, nikunhod kini ngadto sa 86% niadtong tuig 2017 ug 76.64% na lang karong tuiga.
Giingong adunay 11 ka barangay ang wala maapektohi sa ilegal nga drugas ug 245 ka barangay ang drug cleared na. (Le Phyllis F. Antojado/BDB)(BANAT NEWS)
- Latest
