Paralitiko napaig sa sunog

CEBU, Philippines – Usa ang patay ug 30 ka panimalay ang naugdaw sa pag-ulbo sa sunog sa Sitio San Miguel, Barangay Lorega, Dakbayan sa Sugbo kagahapon sa hapon.

Matud ni Cebu City Fire Marshall, Chief Inspector Noel Nelson Ababon, nga ang sunog nagsugod sa panimalay ni Gaudencia Recolcol.

Ang nakalas sa maong sunog mao si Amado Maglinte, 52, usa ka paralitiko hinungdan nga wala kini napagawas sa iyang kabanay.

Si Albert Angga emosyonal nga niasoy nga tuyo pa niyang salbahon ang iyang uyoan nga si Maglinte nga maoy iyang kauban sa balay apan naglisud siya sa pag-alsa kay bug-at man kini kaayo.

Sumala pa ni Angga nga iyang gisultihan ang iyang uyoan nga balikon lang kay mangayo siya og tabang aron makatabang og alsa, apan sa ilang pagbalik daku na ang kayo ug pakyas na sila pagsalbar niini.

Si Maglinte nakit-an kini nga napaig na sa panimalay diin kini nabiyaan sa iyang pag-umangkon.

Sumala pa ni Ababon nga dili mominus sa P600 mil ang bana-bana nilang danyos sa sunog.

Si Jay-r Mata, tindero sa manokan, nitug-an nga mao nalang ang iyang nabantayan nga init kaayo ug sa iyang paglingi kayo na gikan sa kwarto sa likod sa ilang tindahan.

Gihimakak sab ni Mata ang pasangil sa kadaghanan nga diha nagsugod sa ilang manokan ang sunog. -/GMR (BANAT NEWS)