Ex-VM Belleza mosuporta sa kaatbang
CEBU, Philippines — Mosuporta sa Partidong Alayon ang kanhi bise mayor sa Siyudad sa Talisay nga nakig-atbang kaniadto.
Si Aberdovey Belleza nagkanayon nga wala siya magpapili alang sa sunod tuig nga piniliay apan ang iyang suporta naa nila ni Kongresista Gerald Anthony “Samsam” Gullas sa pagka-mayor ug ni Bise Mayor Alan Bucao.
Iyang gipahibawo nga ang ilang deperensya kaniadto ni Bucao iya nang gikalimtan ug gani ang mopamatuod niini mao ang iyang pagsuporta sa ilang grupo.
Si Bucao nagpasalamat nga nakab-ot nila ang pagbalik sa maayo nilang kabubot-on.
Siya nagkanayon nga nagkita sila ni Belleza aron hisgutan ang kalihukan sa shooting competition apan iyang giklaro nga wala pa sab sila nag-estorya kabahin sa politika.
“Personally akong pasalamat ni buddy (ilang tawganay). Gani nalipay kaayo among youngest nga anak sa maong news kay usa man si buddy ang nagkugos niya sa bunyag ug mao sad si Kap Yeh-yen kay suod kaayo na sila,” nagkanayon si Bucao.
Samtang si kanhi bise mayor, Atty. Romeo Villarante, nga magpapili sab pagka-bise mayor nipili lang una nga magpakahilom labot sa dagan sa politika.
Si Villarante usa ka independente nga kandidato sa pagka-bise mayor. (BANAT NEWS)
- Latest
