Korte nipahunong sa quarry sa Apo Land

CEBU, Philippines – Niluwat og 72-oras nga temporary environmental protection order (TEPO) ang Regional Trial Court sa pagpahunong sa quarry operation sa Apo Land and Quarry Corporation sa Dakbayan sa Naga.

Si Judge Dennis Larrobis sa RTC Branch 76 ang niluwat sa maong kamanduan kagahappon human nakita ang hulga ngadto sa kinabuhi sa mga residente sa maong quarry operation.

Matud ni Larrobis nga dunay dinalian nga panginahanglan sa pagluwat sa TEPO human ang Naga City Disaster Risk Reduction and Management Office nipahibawo nga dunay bag-ong nakit-an nga liki sa bukid diin nahimutang ang quarry sa ALQC sa mga barangay sa Tinaan, Naalad, Inoburan, Mainit ug Cabungahan.

Ang korte nitamud sab sa suspension order nga giluwatan ni DENR Secretary Roy Cimatu.

Si Atty. Benjamin Cabrido sa Philippine Earth Justice Center, Inc. nagkanayon nga human sa 72-hour TEPO ipahigayon ang summary hearing aron malugwayan ang protection order. Matud niya nga pasiuna pa lang ang maong kadaugan nga ilang naangkon.

Si Larrobis nitakda sa hearing sa Nobiyembre 14, 2018 aron masuta kung lugwayan ba ang TEPO hangtud mahuman ang kaso.

Samtang nagpadayon na ang pagproseso sa pinansyal nga ayuda alang sa 444 ka apektadong pamilya sa landslide sa Siyudad sa Naga.

Ang pangulo sa Naga City Public Information Office nga si Ruth Alensonorin nagkanayon nga nagsugod niadtong Huwebes ang pag-release sa ayuda pinaagi sa tseke.

Siya nipasabot nga dili tinuod ang alegasyon nga gipugngan ang pagpagawas sa mga ayuda ngadto sa mga niapil sa environmental class suit nga giduso sa pipila ka pamilya batok sa kagamhanan sa Dakbayan sa Naga ug ubang ahensya ug kompaniya.

Nadugay lang ang pagpirma sa mga tseke tungod kay ang mayor nilarga sa Manila alang sa usa ka official business. Si Alensonorin nagkanayon nga wala kini mahimo niadtong Nobiyembre 1 ug 2 tungod kay holiday.

Dugang pa niya nga may nagpadayon sab nga orientation alang sa mga representante sa 444 ka pamilya nga nahuman lang niadtong Nobiyembre 5.

Sa mga nisunod nga adlaw, matud niya nga nibiyahe ang mayor sa  Manila alang sa usa ka conference.

Si Alensonorin nidason nga niadto lang Huwebes napirmahan sa mayor ang mga tseke ug dihadiha dayon gipangapod-apod na kini ug magpadayon kini hangtud nga makuha sa tanang 444 ka pamilya.

Matud niya nga ang orientation gipahigayon aron sa pag-abiso sa pamilya sa mga kapilian nga ilang itanyag alang sa relokasyon ug sa humanitarian financial assistance scheme.

Alang sa pinansyal nga ayuda, siya niingon nga ang tanang 444 ka pamilya makadawat tagsa-tagsa og P50,000. May dugang nga P50,000 alang sa mga pamilya nga ang mga balay totally damaged o P20,000 alang sa kabalayan nga partially damaged.

Ang 444 ka pamilya mao ang adunay balay nga nasulod sa danger zone base sa initial delineation nga gipahigayon sa Mines and Geosciences Bureau. (Grace Melanie I. Lacamiento ug May B. Miasco/GMR)(BANAT NEWS)