DPS nangayo og P629M budget

CEBU, Philippines – Gidepensahan ni John Paul Gelasque, assistant department head of public services ang gi-proposed nga P629 milyones nga budget alang sa ilang buhaton ubos sa P8.1 bilyones alang sa 2019 annual budget.

Ang DPS ni-proposed og P201.3 milyones alang sa garbage collection, P64.5 milyones sa rental sa garbage trucks, P232.5 milyones pagpalit og compactor trucks ug uban pa alang sunod tuig.

Karong tuiga, ang siyudad nigasto og P420 milyones sa garbage collection ug disposal niini.

Ang siyudad nag-abang og trucks alang sa garbage collection ingon man ang pag-hire og private contractor nga mohakot ug molabay sa basura.

Matud ni Gelasque nga sa tuig 2019 ang DPS misugyot nga mopalit og 21 ka compactor trucks nga nagkantidad og P11 milyones matag usa niini alang sa garbage collection.  Giingong kong makapamalit na sa maong mga truck ang siyudad makadaginot na unya sa budget sa mga mosunod nga tuig diin tipping fee na lang ang gastohan ug dili na rentals sa private haulers.

Atol sa budget hearing kagahapon si Gelasque nagkanayon nga ang siyudad mitagana og P133.67 million alang sa rental sa garbage trucks ug P286.8 million sa hauling sa basura karong tuiga nga ang tanan nikantidad ngadto sa P420 milyones.  (/BDB)(BANAT NEWS)