Manindahay atol sa Sinulog mag-ID

CEBU, Philippines – Ang mga manindahay kinsa buot mamaligya atol sa Sinulog sunod tuig ang panghatagan og ID matud ni Konsehal Dave Tumulak, overall chairman sa Sinulog 2019.

Gipasabot ni Tumulak nga ang paghatag og ID sa mga manindahay kabahin kini sa ipatuman nga seguridad atol sa nahisgutang kalihukan.

Ang deadline sa pagpangrehistro sa mga manindahay kinsa buot maninda atol sa Sinulog karong sa Disyembre 14 niining tuiga.

Matud usab ni Tumulak nga ang mga manindahay ibutang kini diha sa nagkalain-laing dapit aron dili maghuot ug paghatag usab kini og dalan sa mga tawo ilabi na diha sa Basilica Minore del Sto. Niño.

Gipahibawo usab ni Tumulak nga kon magsugod na ang novena sa simbahan nga sugdan karong Enero 10 hangtod sa 20 did-an ang mga motorista nga moparada sa ilang mga sakyanan lakip na ang mga motorsiklo diha sa 10 metros gikan sa koral sa simbahan.

Did-an usab ang mga manindahay nga mopaduol sa simbahan aron ang mga manimbahay dili maglisod sa pagsulod ug gawas diha sa Basilica ug kong adunay mga emerhensiya dali usab nga makalusot.

Nasayran nga ang Division for the Welfare of the Urban Poor (DWUP) maoy mopahiluna og dapit nga butangan sa mga vendor aron hapsay ug dili sila makasamok sa agianan. (/BDB)(BANAT NEWS)