Usa sa nagpatay sa babayeng negosyante nadakpan

CEBU, Philippines — Nadakpan ang usa sa mga gipasanginlang suspek sa pagpatay sa usa ka negusyanteng babaye nga gisulod pa sa refrigerator sa pamasin nga dili kini makit-an, ang kapolisan nagtuo nga pagpangawat ang motibo sa maong krimen.

Ang usa sa mga suspek nga nasikop mao si Jay-R Banilad, lumad nga taga Barangay Tigbao, sa Lungsod sa Badian.

Si Supt. Marlu Conag, pangu sa kapulisan sa Syudad sa Talisay nitataw nga si Banilad ug ang duha ka magsuon maoy sulogoon ni Victoria Po Loa, 62,(apelyido dili Lua sa unang nigawas nga balita) nga taga Barangay Tabunok, sa Dakbayan sa Talisay. Ang laing duha nga gipangita mao sila si Johny ug Jeffrey Duarme.

Si Conag miingon nga nitug-an kaniya ang kabanay sa namatay nga wala sila’y laing gidudahan gawas lamang sa tulo tungod kay sila maoy katapusang nisulod sa panimay sa namatay.

Gani makatulo na kahigayon nga gikawatan ang namatay diin nangawagtang ang ilang minilyong salapi, alahas ug walo ka armas kay ang pamilya miyembro sa gun club. Si Loa katapusang nakit-an sa kabanay niadtong Nobiyembre 1 ug napalgan niana nang pagka Nobiyembre 3 sa buntag diha sa abandonado nilang bodega ug gislod ang lawas niini sa usa ka refrigerator.

Matud pa ni Conag sudlonon ang lugar nga gitagoan sa dinakpan kay gilakaw pa nila kini og tuyo usa ngadto sa duha ka kilometro aron dili sila mabantayan. Nakuhaan og .45 nga armas si Banilad nga adunay unom ka bala ug usa ka bala sa .9mm nga pistola.

Niangkon si Banilad kanila nga usa siya sa nipatay ni Loa. Nakaangkon og bun-og sa kalawasan ang biktima hangtud nga kini namatay.

Aduna’y report nga usa sa mga tag-iya ang biktima sa sikat nga brand sa bottled water, dakong hotel sa siyudad ug shipping company apan si Conag niingon nga ila pang susihon ang maong report.

Gipaningkamotan nila ni Conag nga ang nahabiling mga tawo nga gipangita masikop sulod sa 24 oras aron masulbad ang maong linuog nga pagpatay.

Gituohan sa kapulisan nga pamilyar sa panimay sa biktima ang mga suspek tungod kay bisan ang lima nila ka mga iro wala gyud mopaghot. (BANAT NEWS)