Geo Transport na ang mohakot sa basura sa siyudad

CEBU, Philippines — Gideklarar sa Cebu City Bids and Awards Committee (BAC) ang Geo Transport and Construction Inc. isip winning bidder alang sa rental sa heavy equipment nga nagkantidad og P35 million nga gitagana alang karong buwana hangtud sa Disyembre karong tuiga.

Ang maong kantidad alang sa abang sa 11 ka dump trucks ug 10 ka compactor trucks nga mokolekta sa basura gikan sa kabarangayan sulod sa 24-oras.

Gikan ang P35 million sa supplemental budget sa Department of Public Services niining tuiga.

Nagkanayon ang pangulo sa BAC, Ronaldo Malacora, nga gawas nga nag-inusarang bidder, ang supplier nakatuman sab sa mga gikinahanglan nga mga rekisitos nga nakalatid sa balaud.

Sa eligibility study, ang Geo Transport nakasumetir og tulo ka klase sa dokumento nga mao ang legal, technical ug financial.

Sa legal documents, ang supplier rehistrado sa Philippine Government Electronic Procurement System (PHILGEPS), adunay tax clearance, business permit, Bureau of Internal Revenue (BIR) registration ug uban pa.

Ang technical documents naglangkub sa impormasyon nga ang supplier nisulod og rental contract kaniadto.

Samtang sa financial ang dokumento kinahanglan mapamatud-an nga ang supplier financially capable.

Sayo niadtong Oktubre ang BAC nagpahigayon og public bidding alang sa rental sa heavy equipment.

Nunot sa maong kalambuan, ang Geo Transport gilauman nga mohatag og serbisyo ngadto sa Siyudad sa Sugbo.

Aron masusi ang maong supplier kung nakatuman sa ilang kontrata sa siyudad, ang DPS ni-assign og supervisors nga mo-monitor sa ilang operasyon.

Ubos sa terms of reference, ang nidaug nga service provider kinahanglan nga dunay extra trucks aron mahulipan o kaha maayo ang guba nga mga ekipo.

Gawas niini, ang contractor obligado sab nga moabaga sa krudo sa mga sakyanan.

Ang papel lang sa siyudad mao ang pag-monitor sa operasyon sa service provider ug pagbayad sa service fee.

Dili kini ang unang higayon nga ang siyudad nihimo sa maong pamaagi.

Niadtong Oktubre 2017, ang siyudad nagsugod og abang og trucks aron pagpalambo sa inadlaw-adlaw nga koleksiyon sa basura.

Karong tuiga, P124 million ang gigasto alang sa rental scheme. -/GMR (BANATNEWS)