Mga kandidato sa PDP-Laban wa pa giisa ni Duterte

CEBU, Philippines — Wala pa pormal nga giendurso ni Presidente Rodrigo Duterte ang mga kandidato ubos sa Partido Demokratiko Pilipino-Lakas ng Bayan (PDP-Laban) sa Sugbo.

Si Duterte nitambong sa pundok sa mga kandidato sa PDP-Laban ug mga kaalyado sa niaging gabii nga gipangulohan nilang Kongresista Gwendolyn Garcia sa Lalawigan sa Sugbo ug Bise Mayor Edgardo Labella sa Dakbayan sa Sugbo.

Gipasalig hinoon ni Duterte nga mobalik siya human sa Pasko aron iisa ang mga kamot sa mga kandidato sa administrasyon.

“Pero mo-raise ko inyo kamot, mobalik ko after Christmas, kay si Inday (Sara) naa pud siyay gipangpili, ni-raised pud, nakig-kompetensya pud ang b….g, bantay jud mo anang bayhana kay maldita na,” matud ni Duterte.

Ang gipasabot ni Duterte ang pag-endurso sa iyang anak nga si Davao City Mayor Sara Duterte kang Garcia ug Bise Gobernador Agnes Magpale sa niaging semana.

Subling nalitok ni Duterte ang pangan ni Daanbantayan Mayor Vicente Loot dihang naghisgut kini batok sa ilegal nga drugas ug batok komunismo nga maoy iyang criteria sa mga kandidato nga iyang suportahan.

Apan mas grabe ang iyang paglatos kang Cebu City Mayor Tomas Osmeña.

“Dili gani ta magkasinabot sa atong estorya tamparuson taka, dili ni si Duterte nga taga Danao, taga Mindanao ni,” matud ni Duterte.

Si Garcia nagpasalamat nilang Presidential Assistant for the Visayas, Secretary Michael Lloyd Dino, ug Presidential Adviser on Legislative Affairs, Sec. Adelino Sitoy, nga natigayon ang maong pundok.