Duha patay sa drug bust

CEBU, Philippines – Duha ka gipasanginlang durugista ang patay samtang usa ang nasikop human sa gipahigayon nga buy- bust operations sa Sitio Sawsawan, Barangay San Roque, Dakbayan sa Talisay niadtong Lunes sa alas 10:15 sa gabii.

Ang namatay mao sila si Eduardo Piloto alyas Lantoy, taga Barangay Tanke sa maong siyudad ug si Errol Fernandez, 22, taga Barangay San Isidro sa nahisgutang siyudad.

Ang ilang kauban nga nasikop mao si Ronnie Fernandez alyas Ronnie, 53, nagpuyo sa Lipata, Lungsod sa Minglanilla.

Base sa imbestigasyon sa kapulisan nasuta nga adunay nadawat nga impormasyon sa kapulisan labot sa kalihukan ni Piloto hinungdan nga ilang gihimo ang operasyon.

Matud pa nga nakabantay ang mga suspek nga polis ang ilang gikasabot ug sa pagduol sa police back-up nibunot pareho sa ilang mga armas ang duha hinungdan nga giunhan na lang sa pagpusil sa mga operatiba.

Nakaangkon og daghang samad pinusilan ang mga durugista samtang si Ronnie ang nikaging sa iyang gibarogan ug wala na’y nahimo.

Nakuha nga ebidensya gikan kang Piloto ang .45 nga armas nga aduna’y lima ka buhing bala ug ang buy-bust money samtang .38 nga revolver nga aduna’y lima ka bala gikan ni Errol Fernandez.

Usa ka medium nga pakete ug lima ka gagmay nga pakete nga gituohang may sulod nga shabu ang nakuha gikan ni Ronnie Fernandez.

Si Supt. Marlu Conag, pangu sa kapulisan sa Siyudad sa Talisay miingon nga nailhan si Piloto nga supplier sa ilegal nga drugas sa Barangay Tanke. Gani ilang nakuha nga impormasyon nga sa miaging semana nagpasalba sa iyang armas si Piloto ug nagsyagit-syagit nga aduna siya’y patyon nga polis.

Nakuha sab nila ang cellphone niini nga nadiskubrehang adunay plano nga tulison ang usa ka convenience store sa ilang barangay ug patyon ang guwardiya niini kon magkinaunsa. (/IBM)(BANAT NEWS)