Nagmaoy nalandig sa tambalanan human napusili sa polis

CEBU, Philippines — Nalandig diha sa Talisay City District Hospital ang usa ka giingong hubog nga nagmaoy human kini mapusili sa mga polis nga niresponde niadtong Domingo sa gabii diha sa Isla Verde, Barangay San Isidro, Dakbayan sa Talisay.

Si Domingo Banos, 47-anyos, residente sa maong dapit nakaangkon og samad pinusilan sa tiyan nasikop sa mga polis ug daling gidala diha sa TCDH.

Base sa imbestigasyon sa kapolisan sa wala pa mahitabo ang insidente ang silingan ni Banos nga si Emely Gingoyon, 52, naglakaw kini diha sa karsada.

Nakita ni Gingoyon si Banos nga nag-inom og ilimnong makahubog diha sa usa ka      tindahan.

Giingong si Banos nipasingit og sulti nga “lami ipamusil” dihang iyang nakita si Gingoyon.

Ug si Gingoyon nisita kang Banos nganong nasuko kini.

Sa walay pagduha-duha gisagpa ni Banos si Gingoyon katulo ka higayon ug gitukmod apan nisukol si Gingoyon hangtud nga nawagtang sa iyang balanse si Banos dayon natumba ug naigo ang ulo niini sa gutter diha daplin sa karsada.

Dali nga nidagan si Gingoyon paingon sa ilahang balay tungod kay giingong si Banos nibunot kini sa iyang armas nga giloklok.

Giingong halos tanang tawo diha sa lugar ang gihagit ni Banos hangtud nga naabot ang mga polis nga sila si PO1 John Rey Lamosao, PO1 Jobe Mar Aying ug PO1 Gilbert Izhar Acain.

Ang maong mga polis nga niresponde nagpaila kini ngadto kang Banos apan giingong wala mokalma sa iyang kaisog si Banos ug nisuway pa kini og pabuto sa iyang armas hinungdan nga giunhan siya og pusil sa mga polis.

Si Superintendent Marlu Conag, hepe sa kapolisan sa siyudad nagkanayon nga legitimate ang operasyon sa iyang mga sakop tungod kay aduna kini complainant. (BANAT NEWS)