Rapist nga hitman nadakpan
CEBU, Philippines — Wa na madayon ang plano sa usa ka gipangitang rapist nga aduna say mga kaso sa pagpatay ug kalambigitan sa ilegal nga drugas nga giingong may patyon untang polis human siya naunhan og dakop sa Zone 3, Barangay Biasong, Dakbayan sa Talisay niadtong Sabado sa hapon.
Ang suspek nga si Jary Parba, 27, nadakpan sa mga sakop sa Provincial Intelligence Branch (PIB) ug sa kapulisan sa Siyudad sa Talisay sa gihimong operasyon sa maong lugar.
Apil sa nadakpan si Rouel Rabaya, 44, nga nagpuyo sa maong dapit. Si Parba nakuhaan sa kapolisan og usa ka dagkong pakete sa shabu, drug paraphernalia ug usa ka .45 kalibre pistol nga armas nga adunay unom ka bala.
Samtang si Rabaya nakuhaan og lima ka gagmay nga pakete sa shabu ug drug paraphernalia. Ang mga ebidensyang ilegal nga drugas nga nakuha gikan sa duha nagkantidad og P472 mil.
Si Superintendent Marlu Conag, hepe sa kapulisan sa maong dakbayan miingon nga wanted sa kasong pagpanglugos si Parba ug miangkon usab kining nakapatay na og tulo ka tawo ug namaligya usab kini og ginadiling drugas.
Matud pang Conag nga si Parba nibutyag nga aduna unta kini giplanohang patyon nga polis apan wala na kini mohatag pa og dugang detalye bahin niini.
Ang duha pasakaan og kasong paglapas sa Republic Act 9165 o Comprehensive Dangerous Drug Act of 2002 ug paghupot og armas. (BANAT NEWS)
- Latest