Libreng balay alang sa mga biktima

CEBU, Philippines – Giduaw ni Pres. Duterte ang Enan Chiong Activity Center sa Dakbayan sa Naga diin gipahiluna ang mga apektadong pamilya sa pagdahili sa yuta sa Tinaan sa maong dakbayan kagabii.

Ang pangulo mipasabot sa mga bakwit diha sa Enan Chiong Activity Center nga dili na gyud sila makabalik sa daan nilang gipuy-an.

Kini base usab sa rekomendasyon sa iyang mga opisyales lakip na ni Mayor Kristine Vanessa Chiong.

Nalipay ang pangulo nga si Gob. Hilario Davide III mitanyag sa yuta sa probinsya diha sa Naga aron maoy himuong relocation site.  Misaad si Duterte nga patukoran sila og tagsatagsa ka mga balay sama sa gitukod didto sa mga bakwit sa Marawi Siege pinaagi sa National Housing Authority.

Hangyoon usab niya ang LTO nga mabutangan og rota sa sakyanan ang lugar samtang gastohan sa DSWD ang pagpalubong sa mga nakalas ug pagpatambal sa mga nasamdan.

Si Duterte miawhag sa katawhan nga dili magkompiyansa matag adunay pasidaan  ang gobiyerno kon may nagpadulong nga katalagman.

Gibasol niya ang dakong kausaban sa panahon karon tungod sa gigrabehon sa epekto niini kon adunay bagyo ug kinahanglang molihok ang tanan kon adunay taliabot nga katalagman.

Sumala pa niya, tungod sa pagdaghan sa mga kabalayan ug estraktura ug natabonan na ang yuta og mga semento maong dili dayon makatuhop ang tubig.

“Basta naay bagyo, hunahunaa gyud ninyo ang kinabuhi. Kon moingon gani inyong militar, polis, si Gob. Davide ..ayaw mo og kompiyansa ilabi na nang giagian og minahan. Mao na nga ako kontra gyud nako ang mining,” matud pa sa pangulo.

Sa iyang pagpamulong didto sa Mactan kagabii, si Duterte miingon nga iyaha gyung pasirad-an ang tanang minahan sa Pilipinas kay di ikabaylo sa bilyones pesos ang kinabuhi sa mga tawo.

Si Duterte kauban nilang DENR Sec. Roy Cimatu, Interior Secretary Eduardo Año, Special Assistant to the President (SAP) Christopher “Bong” Go ug uban pang opisyales diretsong miadto sa Naga inay nga unahon ang una unta niining tuyo dinhi nga forum sa mga doktor didto sa Mactan, aron makita ang kahimtang sa mga biktima.

Gitugotan usab sa presidente ang usa ka ginang nga makabatbat sa iyang reklamo ug ang ginang mipadayag nga buot nilang pahunongon na ang APO Cement sa pagkubkob sa kabukiran sa Naga. (IBM)(BANAT NEWS)