Ginang giingong gilugos sa silingan

CEBU, Philippines – Usa ka 43-anyos nga ginang giingong gilugos sa iyang silingan kinsa dugay na nga naibog sa biktima niadtong Martes sa gabii diha sa Barangay Cantabaco, Dakbayan sa Toledo.

Ang suspetsado mao si Renato Lanoria, 41, minyo, habal-habal driver ug residente sa maong dapit ug napasakaan na kini og kasong pagpanglugos.

Matud ni Senior Police Officer 1 Violeta Godinez, sa Women and Children Protection Desk (WCPD) sa Toledo Police Station nga gikan nangompra ang maong ginang dihang gikalit lang kining gibira sa suspetsado kinsa niadtong higayona nag-atang ra nga mopauli ang biktima. Giingong diha sa kasagbotan daplin sa karsada giamong-amongan sa suspetsado ang biktima.

Human sa maong insidente nangayo og panabang ang maong ginang sa ilang mga silingan ug sa kapitan sa ilang barangay hinungdan nga dali nga nadakpan ang suspetsado ug gitugyan kini ngadto sa kapolisan.

Matud ni Godinez nga dugay na nga magsige og tutoktutok si Lanoria ngadto sa biktima kinsa usab dugay na nga buwag sa bana. (/BDB)(BANAT NEWS)