Presyo sa bugas sa Sugbo wala mosaka

CEBU, Philippines – Ang presyo sa bugas diha sa Carbon Public Market, Siyudad sa Sugbo wala mosaka base sa pakisusi ni Davao Representative Karlo Nograles kagahapon sa buntag.

Matud ni Nograles nga wala siyay nakita nga problema dinhi sa Sugbo tungod kay regular ang supply og bugas sa National Food Authority (NFA) ug sila nagtuman sa mga rekisitos.

Matud usab ni Nograles nga ang presyo sa bugas sa Mindanao nisaka kini ilabi na sa Cagayan De Oro kompara nganhi sa Sugbo.

Giingong ang 100 ka sakong bugas nga suplay sa NFA diha sa mga outlet nikunhod kini ngadto sa 25 ka sako na lang matag semana.

Ug tungod niini dili masakbang ang panginahanglanon sa mga konsumedor hinungdan nga nisaka gyud ang presyo sa bugas ngadto sa CDO.

Isip chairman sa House Committee on Appropriations, si Nograles buot masayod sa kahimtang sa presyo sa bugas sa ubang mga lugar aron duna silay basehan sa pagsukitsukit sa mga opisyal sa NFA atol sa budget hearing karong Lunes. Matud ni Nograles nga ang Kongreso mangutana kabahin sa P5 bilyones nga budget nga gigahin sa pagpamalit og bugas. (BANAT NEWS)