Duterte motambong sa Charter Day sa Mandaue
CEBU, Philippines – Gikompirmar nga motambong si Presidente Rodrigo Duterte sa mga kalihokan sa pagsaulog sa charter day sa Mandaue karong adlawa.
Karong buntag himuon ang groundbreaking sa government center sa maong dakbayan ug pagka alas 3 sa hapon himuon ang groundbreaking sa lima ka andanang edipisyo alang sa socialized housing program diha sa Barangay Looc sa Dakbayan sa Mandaue.
Ang maong proyekto giabagan sa National Housing Authority diin gigahinan kini og P60 milyones alang sa 600 units.
Ang kagamhanan sa Mandaue City ang nihatag og yutang katukoran sa mga balay ug mao usab ang nipili kon si kinsa ang mga beneficiaries nga hatagan niini.
Gipaabot nga motambong usab si Davao City Mayor Sara Duterte sa groundbreaking ug ubanan ang amahan sa program proper sa Mandaue City Sports Complex matud pa ni Mayor Gabriel Luis Quisumbing.
Samtang si Cebu City Vice Mayor Edgardo Labella kinsa maoy Presidente sa Partido Demokratiko Pilipino-Lakas ng Bayan (PDP-Laban) miingon nga naandan na nga aduna sila’y private dinner human sa kalihokan sa presidente ug ang problema sa drugas ang kanunay nila nga hisgotan.
Si Chief Supt. Debold Sinas mibutang na sa full-alert status sa kapolisan alang sa seguridad sa presidente ug sa mga bisita.
“Actually, murag naa lang silay estoryahan ni Mayor Quisumbing tapos wala na mi kabalo unsa pa ang iyang mga activities basta usual ini’g ka gabii mouli na na siya just like before,” butyag sa maong heneral.
Aduna say giandam nga sakop sa Civil Disturbance Management (CDM) sa lugar tambongan ni Duterte tungod sa posibilidad nga adunay magpahigayon og lihok protesta. (Rowena Capistrano, Decemay Padilla ug Camille Pateres/IBM)(BANAT NEWS)
- Latest