Margot ug Magpale uyon ilisan ang pangalan sa airport

CEBU, Philippines – Si Konsehal Margarita Osmeña sa Dakbayan sa Sugbo ug Bise Gobernador Agnes Magpale nipadayag sa ilang pag-uyon nga ilisan ang pangalan sa Mactan Cebu International Airport ngadto sa Lapu-Lapu International Airport.

Si Osmeña kinsa chairman sa Committee on Tourism sa siyudad nagkanayon nga uyon siya nga ilisan ang pangalan sa tugpahanan apan kinahanglan nga dili wagtangon ang word nga “Cebu” tungod kay ang Lapu-Lapu anaa man kini mahimutang sa Cebu.

Gipasabot ni Osmeña nga posibleng dunay mga tawo ang wala mahibawo kong asa nahimutang ang Lapu-Lapu ug ang tugpahanan naila sa dugay nang panahon nga Mactan, Cebu.

Matud ni Osmeña nga buot usab niyang mahatagan og identity ug pasidungog si Lapu-Lapu kinsa usa ka bayani ug ingon man ang Dakbayan sa Lapu-Lapu diin nahimutang ang tugpahanan nga maoy gateway sa Visayas.

Si Magpale sa iyang bahin, nagkanayon nga wala siya'y problema niini bisan pa man nga aduna siyay nadunggan nga pipila nga nisupak  tungod kay dili kini "attractive" ug dili dali nga matiman-an.

"I believe, nga constant use, that will familiarize and that’s the reason nga we will rename it kay buhion nato ang diwa, the nationalism of the chieftain Lapu-Lapu. I’m all for it", matud ni Magpale.

Ang National Historical Commission of the Philippines (NHCP) mao ang nisugyot nga usbon ang pangalan sa tugpahanan sa Sugbo ug ipangalan kini kang Lapu-Lapu.

Ang maong tinguha gisuportahan ni Presidente Rodrigo Duterte kinsa nagkanayon nga angayan kini sanglit si Lapu-Lapu man ang unang lumad nga nanalipod batok sa mga langyaw kinsa nisuway og sakop sa Pilipinas. (Le Phyllis F. Antojado/BDB)(BANAT NEWS)