Puya gisagol sa basura
CEBU, Philippines — Batang lalaki nga giingong bag-o lang gipanganak ang napalgang patay nga gilabay sa landfill sa Tapul, Dakbayan sa Talisay kagahapon sa alas 10 sa buntag.
Si Kapitan Mary Ann Nolasco sa Barangay Tapul niingon nga ang mga mamasurahay nga naglumba sa pagpangukay sa garbage truck sa Barangay Bulacao ang nakakita ug nipahibawo kaniya sa ilang nakit-an.
Matud ni Nolasco nga gikan ra gyud sa Barangay Bulacao ang bata nga gisulod og itom nga plastic bag.
“Sayang kaayo ang bata unya bus-ok pero wala na kay patay naman. Wa gyuy kalooy ang inahan ini,” asoy pa ni Nolasco. Dali nga nitawag si Nolasco sa kapolisan aron mahimoan og imbentaryo ang ilang nakit-an ug gilahos sa simbahan aron mabendisyonan ang bata dayun gilubong sa pangpubliko nga sam-ang sa Barangay Cansojong aron kini mapahiluna. Dugang ni Nolasco nga lisud na sa pagsubay kun asang dapita sa Bulacao gikan ang itom nga plastic bag. (/GMR)(BANATNEWS)
- Latest