Dunay shabu lab sa Cebu?

CEBU, Philippines — Dako ang pagduda sa hepe sa Cebu City Police Office nga si Police Senior Supt. Royina Garma nga adunay shabu laboratory dinhi sa Sugbo nunot sa walay pagkahubas nga supply niini base sa gidaghanon sa drugas nga ilang nasakmit sa mga operasyon.

Sa labing uwahi nilang operasyon, usa ka gidudahang drug pusher ang ilang nadakpan sa buy-bust operation sa Barangay Sambag Dos, Dakbayan sa Sugbo mibalor sa P6.5 milyones.

"Possible may laboratory, posibleng may bodega, it’s just abundant eh," pagduda pa ni Garma.

Dugang niya nga ilahang naobserbahan kon aduna silay buy-bust operations ug mo-order sila og daghang shabu, dali ra kaayong makadala ang mga suspect sa ilang gikinahanglang gidaghanon.

"You can just simply order and then in a few minutes they can just produce. Maraming supply," matud pa ni Garma.

Nunot niini, gisaad sa kapolisan nga palapdan  ang ilang monitoring.

Sa gipahigayong buy- bust operation sa kapolisan sa Sambag 2, usa ka Reinhard Moreno, 29, ang nakuhaan og lima ka mga dagko ug usa ka medium pack sa gituohang  shabu.

Nakuhaan sab siya og P12 mil nga kwarta nga gituohang halin niini sa pagpamaligya og mga shabu.

Giingong ang middleman ni Moreno naa sa Cebu Provincial Detention and Rehabilitation Center, wala hinuon ibutyag ang dugang impormasyon bahin niini gawas lamang nga pinaagi na sa social media ang transaksyon sa drugas karon.

"I have already coordinated with the jail warden and he is already aware of this and initially, what he did was to isolate the person and nag-conduct na rin sila ng investigation. So may instruction din ako sa investigator to coordinate din sa BJMP para malaman din natin kung saan naman yung source nung middle man, yung tumawag," dugang sa maong direktor.

Niadtong Septiyembre 24, 2004 adunay nadiskubrehang gidudahang mega-shabu laboratory diha sa Mandaue City nga miresulta sa pagkasikop sa onse ka mga tawo diin siyam kanila mga Chinese nga gitawag og “Shabu 11.”

Silang tanan nakombikto ug gisilotan nga mabilanggo sa tibuok nilang kinabuhi. (/IBM)(BANATNEWS)