Bike, motorcycle patrols gilusad
CEBU, Philippines — Gilusad sa Cebu City Police Office (CCPO) ang Bike Patrol Team samtang ang Mandaue City Police Office milusad usab sa ilang “riding-in-tandem” nga mga polis nga pareho ang tumong mao ang pagpakgang sa mga krimen diha sa maong duha ka siyudad.
Kagahapon atol sa ceremonial turnover sa 30 ka mga bisikleta gikan sa usa ka pribadong kompanya, ang hepe sa CCPO nga si Sr. Supt. Royina Garma miingon nga gamiton ang mga bisikleta sa pagpatrolya sa mga gagmay’ng eskinita lakip na ang mga pribadong subdibisyon.
Bahinon ang maong mga polis ngadto sa upat ka team nga moabag sa mga police stations pagpatrolya.
Mokapin kun kulang P200 mil ang kantidad sa mga bisikleta nga gidonar sa Saturn Gaming Corporation.
Ang regional director sa LTO- 7 nga si Victor Emmanuel Caindec kinsa maoy pinasidunggang dinapit sa maong seremonya diha sa CCPO miingon nga mas maayo ang bisikleta gamiton. “Una, for the environment it’s very good less pollution, number two that allows them to go into areas nga impassable or challenging ang pagsulod sa motorized nga mga sakyanan, ikatulo it is also good for their health kay naa silay exercise,” sigon ni Caindec
Samtang ang MCPO mopakatap usab sa ilang mga sakop nga magsakay og motorsiklong gikan sa Mandaue City Hall alang sa paspas nga pagresponde ug pagpatrolya.
Si Chief Inspector Mercy Villaro sa MCPO miingon nga mag-uniporme ug mag bullet proof ang mga polis sa motor ug magdala og tag-as nga kalibreng armas.
Nagtuo si Villaro nga managana na gyud ang mga kriminal karong adunay mga polis nga makagukod nila. - Kenna Kyla Calizar (BANAT NEWS)
- Latest
