Ermita butanga’g daghang polis

CEBU, Philippines — Sama sa Barangay Tanke, Dakbayan sa Talisay, plano usab nga pabutangan og pwersa sa Regional Mobile Force Battalion ang Barangay Ermita, Dakbayan sa Sugbo alang sa pagmentinar sa kalinaw ug dali nga pagkasikop sa mga kriminal sa maong lugar.

Ang Ermita ug Tanke parehong gihugpaan og ilegal nga drugas ug makadaghan na kining gironda sa mga otoridad sa nanglabay nga mga katuigan apan padayon gihapong adunay mga makuhang ilegal nga drugas sa maong mga barangay.

Nakita sa direktor sa Police Regional Office 7 nga si Police Chief Supt. Debold Sinas nga epektibo ang gihimo ngadto sa Tanke diin daghang mga polis ang gipakatap hinungdan sa pagkasikop sa daghang mga durugista kada adlaw.

Gibutangan og 43 ka sakop sa RMFB ang Tanke sugod niadtong Agosto 3.

Ang hepe sa Talisay City Police Station nga si Police Supt. Marlu Conag nagkanayon nga sukad sa pag-abot sa maong pwersa, nakadakop na sila og 34 ka mga kriminal nga nalambigit sa mga krimen sa lugar. Tungod niini, ang template nga gipatuman sa Tanke maoy ilang sundon diha sa Ermita.

Gibutyag ni Sinas nga ang director sa Cebu City Police Office nga si Police Senior Supt. Royina Garma mao ang nihangyo pabutangan og dugang pwersa ang Ermita.

“I will have the personnel ng mobile force to assist the local because of the limited personnel and anad na kaayo kay kaila na didto sa local. So we might need kadtong RPSB ( gitawag na karon og RMFB) nga at least, full force sila,” matud pa ni Sinas. Sumala pa ni Sinas anam-anamon nila ang pagpakatap og daghang polis sa mga lugar nga daghan og tawo.

“Cebu City is still safe. That’s why we have adding more  personnel on the streets,” si Sinas nagkanayon.

Ang pamahayag ni Sinas dakong sukwahi sa paghulagway ni Cebu City Mayor Tomas Osmeña ug ubang local leaders sa Sugbo nga kuyaw na kaayo karon tungod sa mga sagunson nga mga pagpatay.

Kahinumdoman nga dili pa lang dugay, usa ka 4-anyos nga batang lalaki nga nagtuon sa iyang leksyon sud sa iyang lawak sa ilang balay diha sa Ermita ang namatay human naigo sa saag nga bala atol sa operasyon sa mga polis sa Carbon Police Station batok sa mga gidudahang nalambigit sa ilegal nga drugas, ang kapolisan miinsister nga wa sila nakapabuto og armas anang hitaboa. (BANAT NEWS)