‘Cartoon babies’ gipangitaan og sulbad

CEBU, Philippines — Dugay na nga nahimong suliran sa mga opisyal sa Barangay Poblacion Oriental, Consolacion ang mga bata nga ilang gitawag og mga cartoon baby o mga bata nga magsuroy-suroy ug magdala lang og karton nga hapin sa pagkatulog. Si Barangay Kapitan Arnulfo Abinales niingon nga naglakip sa ilang gihimo nga pagtagad sa maong mga bata nga sagad sa mga menor de edad ang paghipos kanila.  Kuyog kanila ang kapolisan sa lungsod ug gihatagan nila og pagkaon ingon man mga sapot. Human sa ilang paghatag og pagkaon ug pakaligo, ilang gipapauli dungan ang tukmang pahimangno.

Si Abinales niingon nga pipila ka bata ang mahadlok na mopauli sa ilang panimalay maong ilang gitugyan ngadto sa Municipal Social Welfare and Development Office sa pagseguro nga luwas ang ilang kahimtang.

Dugang ni Abinales nga sanglit walay kapahimutangan ang MSWDO maoy gihimo ang pagtugyan na lang ngadto sa tagsa-tagsa ka ginikanan.

Apan namatikdan nga human gipapauli namalik ra gihapon sa pagpanggawas ang maong mga bata ug nanghigda na sab og karton. (BANAT NEWS)