Pagpalambo sa agrikultura gihingusgan ni Villar

CEBU, Philippines — Gihingusgan ni Senador Cynthia Villar ang pagduso sa mga balaudnon nga makatabang sa pagpalambo sa agrikultura sa nasud.

Kini ang iyang gibutyag atol sa pagbukas sa mga kalihukan sa ika-449 nga founding anniversary sa Probinsiya sa Sugbo   sama sa Tabo sa Kapitolyo nga gisalmutan sa nagkalainlaing lungsod ug siyudad diin siya ang pinasidunggang mamumulong.  Si Villar kinsa chairman sa Senate Committee on Agriculture nagtinguhang moduso sa Livestock, Poultry and Dairy Bill tungod sa iyang kabalaka nga uno porsiyento ra ang produksiyon sa dairy industry sa nasud samtang 99 porsiyento ang gikan sa laing nasud nga dili makaya pagpalit sa kadaghanan.

"I'm really encouraging dairy and so this year, I will try to pass Livestock, Poultry and Dairy Bill which will give more budget to this sector of our agriculture," matud ni Villar.

Gihisgutan sab niya ang pagpasar sa balaud mahitungod sa coconut industry development diin ang salapi nga anaa sa gobiyerno gikan sa coconut levy fund adunay kantidad nga P75 bilyones ug adunay P30 bilyones nga assets nga ilang ibaligya apil ang United Coconut Planters Bank.

Ubos sa balaud, ang interes ihatag sa mga mag-uuma sa lubi nga gimando sa balaud ug lakip niini ang mga processing equipment, scholarship programs, tabang sa paghatag og gahum sa organisasyon ug uban pa.

Dugang ni Villar nga sa maong balaud, mohatag ang gobiyerno og P10 bilyones matag tuig sa Philippine Coconut Authority aron tubagon sa gobiyerno ang responsibilidad sa coconut industry. Nova Jane A. Yanson (BANAT NEWS)