Langan sa proyekto sa barangay sulbaron sa ABC

CEBU, Philippines — Naglaraw ang pangulo sa Association of Barangay Councils (ABC) sa Siyudad sa Talisay nga moumol og grupo nga ang trabaho mao lang ang pagtabang sa paghimo og program of works sa kabarangayan ingon man pagtutok sa bidding sa nagkalain-laing proyekto sa barangay.

Si Kapitan Marietta Bucao niingon nga mao kini ang kasagarang langayan sa paglambo sa usa ka barangay kay sa naandan diha ra sa engineering department magsalig hinungdan nga malangay. Si Bucao nihangyo na ni Engr. Ariel Araw-Araw sa Engineering Department kun mahimo ba kini aron ang yangungo sa mga kapitan matubag. Samtang si Bise Mayor Alan Bucao nibutyag nga mao kini ang usa sa prayoridad sa iyang asawa kinsa nakakita gyud sa dakung problema sa pagpatuman sa proyekto.

Ang bise mayor nitataw nga estoryahon sab nila si Edgar Mabunay, budget officer sa siyudad, nga motudlo og mga tawo nga maoy motutok sa bidding kay kini sab ang suliran sa barangay nga naa sa kabukiran. “Aron dili na magsige og balik-balik ang mga kapitan sa City Hall unya mao ra na ang ilang adtoon,” matud ni Bise Mayor Bucao.

Dugang pa niya nga aduna nay kasabutan sila ni Mabunay nga mohimo og lahi nga mga clerks nga ang trabaho mao ang pag-abag sa mga opisyal sa barangay. (BANAT NEWS)