P2.1 bilyon na ang nakolekta sa kapitolyo
CEBU, Philippines — Moabot sa P2.1 bilyones ang kita sa Probinsiya sa Sugbo sa unang unom ka buwan sa tuig 2018.
Matud ni Emmanuel “Manny” Guial, ang assistant Provincial Treasurer, nga apil na sa P2.1 bilyones ang Internal Revenue Allotment (IRA) nga madawat sa Kapitolyo gikan sa nasudnong panudlanan. Sa pagkakaron moabot na ngadto sa 52.23 porsiyento ang nakab-ot sa Probinsiya sa Sugbo gikan sa target niini nga makolekta sa tibuok tuig nga P4.039 bilyones.
Matud ni Guial nga mas taas sab og 17.27 porsiyento ang kita sa Probinsiya sa Sugbo gikan sa Enero hangtud Hunyo karong tuiga kun itandi sa P1.798 bilyones niadtong niaging tuig sa susamang mga buwan.
Base sa record sa Provincial Treasurer’s Office, nga labing daku nga natampo sa koleksyon gikan sa non-tax receipts nga moabot sa P159 milyones, gisundan sa koleksyon sa mga hospital sa probinsiya nga moabot sa P139.1 milyones ug ang total tax revenue nga P122.6 milyones.
Positibo si Guial nga sa paghuman sa tuig 2018, makab-ot o malapas sa Kapitolyo ang target nga koleksyon niini karong tuiga. GMR (BANATNEWS)
- Latest
