Sakyanan sa konsehal nadakpan kay ni-counterflow
CEBU, Philippines — Hilabihang daghana sa mga sakyanan nga nasakpan sa mga sakop sa CITOM-Task Force Alpha (TFA) nga mi-counterflow karong semanaha.
Si Isko Ouano, hepe sa operations branch sa CITOM, mipadala og report ngadto kang Mayor Tomas Osmeña sa kalamboan sa ilang pagpanakop sa mo-counterflow.
Matud ni Osmeña nga base sa report nga iyang nadawat, dunay 80 ka motorsiklo, duha ka PUJ, usa ka taxi, unom ka private vehicles, ug upat ka truck ang gi-impound sa CITOM karong semanaha.
Nakabantay ang mayor nga wala pa gyud maleksyon ang ubay-ubay’ng motorista tungod kay padayong nagkadaghan ang miabuso pinaagi sa pag-counterflow.
Usa ka buwan ang pagtanggong sa maong mga sakyanan bisan pa man sa pamahayag ni LTO-7 Regional Director Victor Caindec nga supak sa balaod ang gihimo sa CITOM.
Matud ni Caindec nga ang LTO ra ug ang LTFRB maoy maka-impound og mga sakyanan kon kini masakpan nga gimaneho og tawo nga walay lisensya, tampered ang serial numbers sa chassis o kaha makina, walay hand brake ug ubang kahimanan nga makapeligro kon kini magpadayon sa pagdagan.
Hangtud karon hinoon wala pa gyuy mipasaka og reklamo didto sa hukmanan aron kwestyonon ang kamandoan sa mayor nga magpa-impound sa mga sakyanan nga masakpang mo-counterflow. (RUB)(BANATNEWS)
- Latest