Mabungahong “Alternativ”

Gikinahanglan matud pa nga huptan nato ato’ng prinsipyo sa kinabuhi ug dili kini ibaligya ngadto sa mga tawo nga bintahoso ug nakamenos nato, bisan pa man sa kawad-on. Dinhi niining maong prinsipyo, mutuyok ang istorya sa kinabuhi ni Alfredo “Pido” Tan, 34 anyos, kinsa tag-iya sa printing shop nga Alternativ ug sakop sa Cebu City Advisory Council sa Philippine National Police ug sinagop sa PNPA Buklod Diwa Class of 2001.

Lumad nga taga Binuangan, Misamis Oriental si Pido diin ikaduha siya sa tulo ka managsuon. Factory worker iyang amahan ug jobless iyang inahan.

Gikan sa Mindanao, nibalhin sa Valenzuela kay didto nagtrabaho iyang amahan. Didto na siya nagtungha sa kinder hangtod sa Grade 3. Human sa lima ka tuig, nibalhin sila dinhi sa Sugbo.  Nipadayon siya og tungha sa Cebu Eastern College, pinaagi sa tabang sa usa ka foundation sa Chinese Community.

“Filipino-Chinese man mi, gitabangan me sa association, half sa tuition fee ra amo bayran. Pasalamat ko ni Mr. Stephen Yap who helped us got the scholarship,”asoy pa niini.

Niining tungora, lain na sab ang trabaho sa iyang amahan. Nigradwar siya sa elementarya ug nipadayon sa high school sa susamang tunghaan pinaagi gihapon sa pag-abag sa foundation.

Kan-on lang matod pa iyang balon sa nagtungha pa siya ug tagsa ra adunay kwarta.

Kay gusto man siya mahimong sundalo, nikuha siya og exam sa Philippine Military Academy sa 1st year pa siya. Nakapasar siya apan wala nipadayon tungod sa kakulian sa pinansyal.

“Napagan gyud akong pangandoy. I really want to become a law enforcer, either military or pulis,”asoy niya.

Nagpokos siya sa iyang pagtuon ug nahimo’ng athlete sa Taekwondo sa CEC. Giasoy ni Pido nga sukad nianhi sila sa Sugbo nagbalhin-balhin sila og puyo kay usahay dili sila makabayad sa abangan.

“Nakapuyo mi’g biniyaan nga balay kay gipapahawa me sa among giabangan ug giimbargo ang mga appliances,” niya pa.

Pila ka higayon matod pa nga mokapyot siya og jeep kay wala’y ikaplite. Ug aron aduna siya’y pambalon, namaligya siya og kaka ug NBA cards sulod sa tunghaan.

Maglisud gihapon sila pagbayad sa tuition bisan katunga busa manghangyo gyud siya kanunay aron lang makakuha og exam.

“Mauwaw ka, nganong akong mga classmates makabayad man, nganong akong parents dili man,”niya pa.

Bisan tuod kapos sa pinansyal, kanunay gihapon malakip sa top 3 sa klase si Pido ug nigradwar  sa hayiskul isip athlete of the year.

Nagtungha siya University of San Carlos sa kursong BS-Business Administration pinaagi sa panabang sa iyang iyaan kinsa nibolontaryo pagbayad sa iyang matrikula. Aron aduna siya’y pamlite, pambalon ug pampalit og mga projects, maghimo siya og cake ug ibaligya sa canteen. Namaligya sab siya og sandwich sulod sa campus.

“Four in the morning pa lang kay nagmata nako aron maghimo’g sandwich. Ang sud sa akong bag kay dili libro kundi baligya,”niya pa.

“Usa raman gyud akong gihuna-huna ato, You do this or you’ll not survive,”sigon pa niya. Nakasinati sab siya og pagtamay gikan sa ubang estudyante sa pagpaninda niya og sandwich. “Masakitan ka, pero laban lang. Kung ma-down ko, mopiyong lang gyud ko, moingon ko nga- I will not be like this forever,” niya pa.

Taliwala sa iyang kaagi, nigradwar gyud siya sa kolehiyo niadtong 2006.

“Kung dili pa lang sa akong auntie nga si Ms. Chona Khu, dili gyud ko makahuman,dako ko’g pasalamat niya,” sigon pa niini.

Nakatrabaho siya sa Parklane Hotel isip sales executive. Daghan matod pa siya og nakat-onan sa pagtrabaho didto apan human sa 11 ka buwan niundang siya ug nag-freelance printing business.

“Moadto ko’g schools, mo-cater ko’g school publishing nila. Ako lang i-job out kay wala man koy printing house,”asoy pa niini.

Dinhi niya nakita ang potensiyal sa maong negosyo. Busa nag-research siya unsaon pagprinta og mga t-shirts. “Akong teacher sauna kay Youtube ra gyud,”niya pa.

Ug hangtod nga gitanyagan siya sa iyang amigo og bakanteng warehouse sa Mabolo nga puwede himuon niyang printing shop. Kay wala man siya’y kwarta, nanghuwam siya sa iyang higala og P50,000 aron ipuhonan.

Ug niadtong Mayo 2009, nahimugso ang Alternativ. Nag-abang siya og usa ka unit nga may P8,000 ang buwan. “Nipalit lang ko’g lamesa, suga, ug pintal,”sigon pa ni Pido. Nindot ang dagan sa iyang negosyo. “Nagsugod lang og 20 orders, nahimong 50,hangtod naabot na og libo,”niya pa. Pila lang ka bulan ang nilabay  nabayran na niya iyang utang nga P50,000. Daghan ang nahitabong kalamboan sa iyang shop. Namalit siya og mga makina.

“Giduwa-duwa lang gyud ang kwarta, girolyo, gihapak-hapak lang, until ni grow,”sigon pa niya.

Gikan sa usa ka unit nahimo  na  kining upat karon. Gikan sa duha ka trabahante, 60 na kabuok sila karon.

“After 9 years, from a company of nothing, we are now one of the market leaders in terms of shirt manufacturing in Visayas and Mindanao,” niya pa.

Alang niya, nagmalampuson ang negosyo gumikan kay, “We did not focus on the 99% failure, among gitan-aw kay 1% hope mao ni-grow gyud ta.”

“Wa tay kwarta but this is what we only have --the vision, goal, drive, determination, & hardwork. If we put them together moasenso gyud ka.”

“Salamat Tita Emmy and Emily Ting kinsa nagpahuwam nakog kwarta para sa pag-put-up og business,”niya pa.

PNP Advisory Council

Niadtong 2014 gihagad siya sa chief of police sa Cebu City nga mahimong Advisory Council sa Philippine National Police. Wala siya nagduha-duha og dawat niini bisan pa man nga wala kini sweldo.

“Advisory Council are those people who are helping PNP,”niya pa.

Pagsulod niya sa maong grupo, nakita niya kon unsa kadako ang suliran sa PNP. Tungod niini nahimo siyang aktibo sa pag-abag sa PNP sa ilang mga programa. Sa iyang dedikasyon, gisagop siya sa PNPA Buklod Diwa Class of 2001.

“With the invitation of PSUPT. Ryan Devaras and PSUPT. Byron Allatog. Technically, na-fulfill na sad ang akong pangandoy. Along the way, it falls into place ba,”niya pa. Gawas sa aktibong pagtabang sa PNP, suportado usab niya ang mga programa sa LGBTQIA community ug sa mga youth organization.

Dako na kaayo og kabag-ohan iyang kinabuhi karon. Bunga matod pa sa iyang mga pag-ampo ning tanang nadawat nga grasya.

“Do not let emotions rule over yourself. When everything around you is already falling, you have to stand up,”tambag pa niya.

Gikinahanglan matod pa nga huptan nato atong prinsipyo ug dili ibaligya ngadto sa mga tawo nga bintahoso.

“Hang on to your moral principles in life. Just like I said before, wala pa gani koy kwarta, ang prinsipyo ibaligya pa gyud nako, unsa naman lang ko?”pamunto niya. Tambag pa niya nga ang pag-ampo, kinahanglan gayud nga kaluhaan og paningkamot. “Whatever you want in life, you really work hard for it.”

Ug isip panapos,  “Peace and order is not just PNP’s job, it is everyone’s business. So we encourage everyone to get involve.”