Mga mayor nga may hulga maka-hire og security personnel

CEBU, Philippines – Gitataw ni Cebu Governor Hilario Davide III nga ang mga mayor nga makadawat og hulga sa ilang kinabuhi mahimo ra nga mokuha og private security nga makabantay kanila.

Ang pamahayag giluwatan ni Davide human nga pipila ka mayor nipadayag og kabalaka sa ilang seguridad human sa sagunson nga pagpatay sa mayor sa Tanauan, Batangas ug sa laing dapit sa Nueva Ecija.

Si Tuburan Mayor Democrito Diamante nga maoy presidente sa League of Municipalities of the Philippines (LMP) Cebu Province Chapter, maoy unang nipadayag og kaalarma tungod sa maong insidente.

Si Davide nagkanayon nga kon nagtuo ang mga mayor nga kinahanglan na sila og dugang security, mahimo sila nga maka-hire og private personnel.

Ang gobernador nagkanayon nga bisan ang iyang police aide, iya nga gipabalik sa headquarters human nga nimando ang provincial director sa kapolisan sa Sugbo nga ipa-recall ang tanang polis nga gidestino sa mga local chief executives.

Nakasabot si Davide sa maong kamandoan sa PNP tungod kay gikinahanglan ang mga polis sa field duties.

Ang Department of Interior and Local Government (DILG) una nga niawhag sa mga mayor nga mosubay sa mga rekisitos ug proseso kon sila mangayo og security personnel. Ang kapolisan adunay police unit nga gitawag og Police Security Protection Office nga maoy gitahasan nga mohatag og security sa mga opisyal ug mga tawo nga may hulga sa ilang kinabuhi. (/RUB)(BANAT NEWS)