Team mosusi sa business permits
CEBU, Philippines — Nagplano si Cebu City Mayor Tomas Osmeña nga moumol og grupo nga mogukod sa dili mominus 10,000 ka business establishments nga giingong wala’y business permit ug wala nagbayad og buhis sa siyudad.
Ang mayor niingon nga niumol siya sa maong ideya human iyang nabantayan nga daghan ang mga magpapatigayon ang nakalapas sa Omnibus Tax Ordinance sa siyudad. Matud ni Osmeña nga ang trabaho sa grupo nga umulon mao ang pagpahigayon og inspeksiyon sa mga business establishments ug sirad-an diha-diha dayon kun wala’y ikapakitang business permit.
“No need for show cause order because you have no permit,” asoy ni Osmeña.
Niadtong April 2017 nagsugod si Osmeña sa paggukod sa mga establisemento nga wala’y business permit.
Itudlo ni Osmeña ang pangulo sa Prevention, Restoration, Order, Beautification and Enhancement (PROBE) Raquel Arce nga mangulo sa closure team.
Giangkon sa mayor gusto niya si Arce maoy mangulo sa grupo tungod kay maayo ang trabaho niini sa PROBE.
Hinoon si Osmeña niasoy nga wala pay petsa kun kanus-a magsugod ang closure operations apan nihatag siya og advance warning sa mga business establishments.
Sa iyang bahin, si Arce niingon nga andam siya modawat sa tahas nga ihatag sa mayor kaniya ug nagpasalamat kini sa salig nga gihatag ni Osmeña kaniya. (BANAT NEWS)
- Latest
