Steve Go gipatay sud sa prisohan

CEBU, Philippines – High profile inmate sa Dakbayan sa Talisay nga gibalhin sa Mandaue City Jail ang gipusil patay sa iya ra usab kauban nga priso pasado alas onse kagahapon sa buntag.

Ang nakalas mao si Steve Go, 40, nga nabalhin sa maong prisohan dul-an sa tuig na ang nakalabay.

Samtang ang suspek mao si Cresenciano Eraña kinsa adunay mga nagkadaiyang kaso sama sa illegal nga drugas, murder ug paghupot og armas.

Si Supt. Jessie Calumpang ang jail warden sa MCJ mibutyag sa Banat News nga adunay nakadungog og butobuto sa armas gikan sa roof top hinungdan dali silang nanawag sa kapulisan.

Ang tigpamaba sa BJMP Chief Inspector Dennis Aliño, nitug-an nga nagpaabot sila karon og official report gikan sa MCJ may kalabotan niini.

Dugang pa ni Aliño, lakip sa ilang gitutukan karon kung nganong adunay nakasulod nga armas sa prisohan ug kon kang kinsa ni ug kon nganong wala kini masakpi nga unta gisigehan na man paghimo og Greyhound Operation sa maong prisohan kada buwan.

Ang pamilya ni Go nangita og hustisya. Ang igsuon ni Go nga nakahinabi sa mga tigbalita miingon nga may kahadlok na ang iyang igsuon diha sa sud tungod sa mga nadawat nga death threats.

Gitug-an sa igsuon nga dili magpaila namarayeg pa kini kaniya nga magpadalaw sa prisohan atol sa Father’s day apan wala niya nahimo kay giabtan kini sa iyang binuwan nga bisita nga bawal makasulod sa MCJ. Ang ugangang babaye ni Go, nasubo ug nagduda nganong gipatay si Go nga usa na man unta kini ka priso.

Si Go kinsa napriso tungod sa kaso sa ilegal nga drugas nabaniog ang pangalan human nga kini maoy gidudahang nalambigit sa pagpalusot og kontrabando sa Talisay City Jail sa dihang napriso pa kini didto.

Tungod niini gibalhin siya diha sa MCJ. Apan atol sa mga Greyhound Operations pirmeng makuhaan og mga kontrabando ug ilegal nga drugas ang selda niini.

Matud pa ni Calumpang nga si Go ug si Erana managkauban ra sa usa ka selda sa nahisgotang bilanggoan. Naabtan pa nila si Erana nga naghupot og armas diha sa sulod sa selda.

Matud pa ni Calumpang, si Erana mitug-an nga ang maong armas gipanagiya ni Go nga iyaha lamang nailog.

Wala pay nahatag nga kompletong impormasyon ang mga imbestigador sa kapolisan sa Presinto 5 sa Mandaue City Police Office (MCPO) bahin sa nahitabo ug kon unsay motibo nga napatay ni Erana si Go.

Ang Commission on Human Rights mopahigayon og motu propio investigation sa kamatayon ni Go.

Si Leo Villarino, Chief Investigator sa CHR-7 miingon nga gusto nilang masayran kung nganong adunay armas sa maong prisohan. (Romeo T. Limpangog/IBM)(BANAT NEWS)