3 mil tawo apektado sa demolisyon

CEBU, Philippines — Sugdan karong adlawa ang paghawan sa mga kabalayan sa gibanabanang tres mil ka mga nagpuyo diha sa kabaybayonan sa Mactan Channel nga nag-atubang sa Mandaue City sa pikas tampi sumala pa ni Lapu-Lapu City Mayor Paz Radaza.

Moabot 190 ka estraktura nga gilangkuban sa mga kabalayan, boarding houses, paabangang estraktura ug mga tangkal sa baboy nga nakalapas sa three-meter easement zone maoy unang pangdemolison.

Matud ni Radaza nga giabisohan nang daan ang mga residente ug mga maapektahang mga establisamento bahin sa plano sa siyudad pinaagi sa City Legal Office.

"We gave them notice already. So, mao na atong giuna kay ang mga nag-abang they can go to some other place kay di man na ilahang lugar," matud pang Radaza.

Giingong anha magsugod ang demolisyon sa Barangay Ibo.

Nag-unang pangbungkagon kadtong mga balay nga ang pundasyon anha gipabarog sa tubig kay matud pang Radaza peligro sila kanunay sa bagyo o kon dagko ang bawod.

Ang demolisyon karong adlawa hagbay ra untang gihimo sa nangaging mga buwan apan ang mga residente sa apektadong mga barangay nga Ibo, Pusok, Pajo, Poblacion, ug Looc daghan kaayong rason hinungdan nga nalangay kini.

Apan si Radaza miingon nga dili na kini mahimo karon tungod kay naa sila sa peligro magpuyo ilabi na nga niadtong nakalabay nga tuig adunay kabalayan nga nangaguba padung sa dagat tungod sa dagkong bawod.

Matud pa nga wa nay rason aron di dayunon ang demolisyon tungod kay mismo ang Environmental Management Bureau (EMB-7) sa Department of Environment and Natural Resources (DENR) miingon nga grabe kataas ang level sa fecal coliform sa tubig sa Lapu-Lapu ug usa sa gibasol kining pagpataka og labay og basura ug hugaw sa tawo sa mga namuyo sa baybayon sa dakbayan.

"I think they just have to observe kung unsay mga panghitabo (and) the reason why napunta ta ani nga estorya," pasabot pa ni Radaza.

Ang demolisyon bantayan sa City Social Welfare Office, Urban Poor Office, the City Legal Office, City Health Department, City Environment and Natural Resources Office (CENRO), City Engineering and Planning ug Lapu-Lapu City Police Office (LLCPO).

Matud ni City Legal Officer Ethelbert Ouano way madawat nga financial assistance gikan sa siyudad ang mga nangabang. (Gikan sa The Freeman/IBM)