Inspeksyon una pa demolisyon

CEBU, Philippines — Nagpahigayon og coastal cleanup kagahapong adlawa sa kabaybayunan sa Santa Fe ang Santa Fe Tourism Enterprise Association Inc.( SAFETEA), usa ka organisasyon nga nakig-alayon sa lungsod alang sa adbokasiya sa industriya sa turismo sa maong lungsod.

Ang maong kalihukan gisalmutan sa mga kawani sa LGU Santa Fe, kapolisan, magtutudlo, estudyante ug mga nanimuyo sa maong lugar nga nagsugod sa ilang adbokasiya niadtong Mayo 5 sa niaging tuig nga gitawag nila og War on Waste o WOW Program.

Si Allan Monreal sa SAFETEA miingon nga himuon na matag buwan ang coastal cleanup aron masiguro ang kalimpyo sa ilang lugar ug sa kalikopan.

Giklaro sa presidente sa SAFETEA nga si Nelson Yuvallos nga wa nila kini himoa tungod nanggawas ang mga taho nga adunay ipa-demolish nga mga illegal structures ang DENR tungod sa paglapas sa Water Code Law.  Giawhag nila karon ang Regional Trial Court Branch 28 ug Community Environment and Natural Resources nga mag-occular inspection sa baynte uno ka mga establisemento daplin sa baybayon nga giingong demolison.

Ang 17 niini anaa sa Santa Fe ug ang upat atua sa lungsod sa Bantayan. Apan sila miapelar nga di una kini demolison hangtud di maklaro kon nakalapas ba gyud sila sa probisyon sa maong balaod nga 20 meter easement zone.

Si Mayor Jose Titing Esgana misugyot nga magbutang og break water 100-150 metros gikan sa baybayon aron di mabanlas ang mga estrakturang naabot sa bawod.  Nagpaabot pa  si Esgana sa written order gikan sa mga hingtungdang ahensya sa pagpaguba sa maong mga estraktura.

“I can not implement beyond what is mandated in the law because everyone has the right to protect their properties.  As provided by our constitution.  Naa na diha ang atong Bill of Rights,” dugang pa sa mayor, apan padayon iyang pag-awhag kanila nga boluntaryong gub-on ang estrakturang nakalapas sa 20 meter easement zone. (/IBM)(BANATNEWS)