Mayor ug maestra nag-ilog sa yuta

CEBU, Philippines – Giilogan tali sa mayor ug maestra sa Dakbayan sa Carcar ang usa ka luna duol sa bag-ong City Hall.

Usa ka Marlene Entienza, 48, magtutudlo sa Ocaña National High School, niangkon nga ila ang duha ka luna nga giingong napalit ni Apura sa kantidad nga P1.2 milyones ug P150,000 sa may Sitio Lamacan, Barangay Valladolid.

Ang luna gipanag-iya sa nangamatay na nga magtiayong Francisca Sabanal ug Alfonso Cantiveros kinsa dunay pito ka anak kinsa usa niini mao si Ernesto Cantiveros, ang amahan ni Entienza.

Matud ni Entienza nga 2014 gibayran sa iyang amahan og tag P25,000 ang unom niya ka igsuong babaye pinaagi sa pagpirma og waiver nga wala na silay labot sa yuta sa ilang ginikanan. Apan sumala pa ni Entienza nga 2017 ila na lang nasayran nga gibaligya sa unom niya ka iyaan ang yuta ngadto ni Apura.

Nobiyembre sa niaging tuig giingong gihasi ang pamilyang Entienza sa mga tawo ni Apura bisan himatyon na ang iyang amahan niadtong higayuna ug gipabuldos ang 32 ka punoan sa lubi ug ubang punoan sa kahoy sa luna nga mao usab ang gitukuran sa ilang panimay.

Base sa kopya sa deed of sale, bugtong ang pangan lang ni Ernesto ang walay pirma.

Matud ni Apura nga ang bahin lang sa unom ka anak ni Francisca ug Alfonso Cantiveros ang iyang gipalit human nagdumili ang mga anak ni Ernesto kinsa patay na.

Gipasabot ni Apura nga dili siya buot nga malangan ang ubang anak sanglit gikan pa kini sa lagyong lugar sama sa Gen. Santos City ug Cavite.

“So the sale of the 6/7 share was consummated except the 1/7 share of Ernesto Cantiveros of the two lots. It was not included in the sale,” matud ni Apura.

Sanglit siya na ang tag-iya sa luna diin anaa pa ang panimalay ni Brenda Cantiveros, asawa ni Ernesto, buot na niya kining papahawaon base sa tambag sa iyang abogado ug ibalhin sa ilang bahin.

Matud ni Apura nga nangita siya sa mga dokumento apan walay gikapakita si Entienza samtang niinsister nga ila ang maong luna.

“I gave them all my documents. The best evidence is the document but giingnan lang ko na wala koy obligasyon nimo sa paghatag sa akong dokumento,” matud ni Apura.

Nunot niini si Apura nipadayag nga nainsulto siya sa gihimo ni Entienza isip mayor ug gitamakan ang iyang katungod. Apan si Entienza nipadayag nga mosang-at sila og ubay-ubay’ng kiha batok ni Apura sa buhatan sa Ombudsman. (/IBM)(BANAT NEWS)