Lima ang patay sa pusil ug dunggab

CEBU, Philippines — Lima ang patay sa pagpamusil ug pagpanunggab dinhi sa Sugbo sa miaging adlaw nga Domingo. Usa kanila biktima sa armadong esnatser dihang kini misukol.

Sa pagpamusil sa may Sitio Proper, Barangay Sinsin sa dakbayan sa Sugbo usa ka Jessie Hagimit, 37, ang gipusil patay samtang naigo sa saag nga bala ang kauban niining si Margie Alcantara.

Naglakaw ang duha sa dihang gihunongan og duha ka lalaking nagmotor ug kalit silang gipamusil. Naigo si Hagimit sa ulo ug namatay samtang naigo sa mga kamot si Alcantara. Wa pa matino sa kapolisan ang motibo sa pagpamusil.

Samtang sa Sitio Lawis, Alaska-Mambaling patay usab si Reynaldo Abarquez, 62, dihang gipusil sa ulo ug sa dughan sa esnatser nga milabni sa iyang kwintas nga bulawan.

Base sa imbestigasyon sa kapolisan nag-inom ang biktima ug amigo nga si Leopoldo Aroa dihang gilabni sa usa ka wala mailhing lalaki ang kwintas sa namatay. Mipalag ang biktima apan gipusil kini. Ang kawatan daling miikyas.

Sa dakbayan sa Lapu-Lapu, patay ang traysikad drayber nga si Serbando Ocon, 58, human kini gipusil diha sa awaaw nga bahin sa Sitio Pool, Barangay Bankal sa maong siyudad.

Si Police Officer 2   Dan  Bacuscosim sa Homicide  Section sa Lapu-Lapu  City  Police Office (LLCPO) miingon nga ngitngit ang nahitaboan ug walay nakakita sa pagpamusil.

Samtang didto sa dakbayan sa Carcar, patay ang usa ka 17- anyos nga lalaki human gipusil diha sa Barangay Valencia. Ang gitumbok nga suspek mao ang 43 anyos nga uyoan niini ug ang 15 –anyos niining anak.

Si PO2 Miguelito Abadilla nagkanayon ang biktima diha sa gawas sa ilang panimay nakigduwa sa manghod dihang giduol kini sa uyoan ug gipusil sa tiyan.

Nasayran nga may bikil ang ginikanan sa biktima ug ang suspek tungod sa panag-ilog sa yuta.

Samtang usa ka 26-anyos nga tanod sa Tungkil sa lungsod sa Minglanilla ang gidakop human nidunggab patay sa gikaaway sa iyang kapuyo.

Ang nakalas mao si Miguel Marcelita, 62, taga Upper Lipata, Barangay Linao ug ang nakadunggab mao si Joven Gonzales. Matud pa parehong nilaban ang duha sa ilang mga kapuyo nga nag-away apan nisangpot sa pagpamuspos ug pagpanunggab. - Rafols Gervacio (BANAT NEWS)