Pito mi-gang rape sa 15 anyos sikop

CEBU, Philippines – Gitanggong karon sulod sa detention cell sa Liloan Police Station ang pito ka mga lalaki nga gidakop human gipasanginlan sa 15 anyos nga dalagita nga gitabangan kini sa paglugos.

Ang pito ka mga suspetsado nga nadakpan sa follow up operation pulos sa usa sa mga barangay sa maong lungsod. Dili lang una hinganlan sa Banat News ang mga suspek sanglit aron matago ang pagkatawo sa biktima kay pulos ra kini mga higala niini.

Si Superintendent Randy Korret nga maoy hepe sa Liloan Police Station miingon nga ilang nadakpan ang pito ka mga suspetsado kagahapon sa hapon human sa pagreklamo diha sa ilang buhatan sa 15 anyos nga dalagita nga gikuyogan sa apohan.

Ang biktima mibutyag nga nahitabo ang pagpanglugos ala-una kagahapon sa kaadlawon diha sa daplin sa baybayon sa maong lugar. Matud pa ni Korret apil sa mga suspek ang 16-anyos  nga tinun-an sa Grade 7.

Ang biktima giingong gidapit og inom sa 20 anyos nga higala nga usa sa mga suspetsado apan nagduda kini nga may gisagol nga kemikal sa ilang giinom maong dali kining nalipong ug gitabangan sa paglugos.

Alas-9 na pasado sa buntag kini nakamata diha sa usa ka payag ug wala na ang mga kainom niini apan nakabantay kini nga giamong-amongan gyud siya hinungdan nga kini misumbong sa kabanay ug midangop sa kapolisan.

Ang mga suspek gitagsatagsa og dakop sa kapolisan ug nga nag-edad gikan 16-anyos ngadto sa 21-anyos ug gikatakdang pasakaan og kasong paglapas sa R.A 8537 Anti-Rape Law in relation to R.A 7610 (Child Abuse). (Rowena D. Capistrano/IBM)(BANAT NEWS)