Checkpoint pahingusgan sa Lapu-Lapu

CEBU, Philippines – Giawhag ni Mayor Paz Radaza ang Lapu-Lapu City Police Office nga hingusgan ang anti-criminality campaign human sa nahitabong sunod-sunod nga patay sulod lang sa 24-oras Awhag ni Radaza nga mohimo og mga preventive operations nga kapugngan ang mga insidente sa pagpamusil ilabi na kadtong mga naglambigit sa motor riding-in-tandem nga mga mamumuno.

Sumala pa sa mayor nga mas maayo masusi ug mailhan kung kinsa ang mga nagpaluyo sa sunod-sunod nga patay ilabi na ang mga biktima nalambigit sa ilegal nga drugas. Buot ni Radaza nga hingusgan sa kapolisan ang mga checkpoints sa adlaw ug gabii.

Gani iya sab giawhag ang kapolisan nga dakpon ang mga motorista nga magtabon sa ilang nawong nga sagad gihimo sa mga mamumuno nga riding-in-tandem.

Si Supt. Rex Lomente, deputy director for operations sa LLCPO, nitug-an nga kanunay ang ilang gihimo nga anti-criminality campaign, ilabi na nga humana ang eleksyon.

Matud ni Lomente nga malinawon ang niaging eleksyon ug kini gikompirmar sa Commission on Elections sa dakbayan sanglit wala sila kadawat og mga panghitabo may labot sa eleksiyon sa kabarangayan sa mainland ug isla sa Olango.

Gitataw ni Lomente nga nalambigit sa ilegal nga drugas ang sagad sa nahimong biktima sa pagpamusil sa mga riding-in-tandem ug nagpadayon ang ilang gihimong imbestigasyon sa pag-ila sa mga mamumuno. (Romeo T. Limpangog/GMR)(BANAT NEWS)