Tulo patay sa Lapu-Lapu ug Cebu City
CEBU, Philippines – Duha ang patay sa managlahing pagpamusil sa Dakbayan sa Lapu-Lapu ug laing usa usab ang gipusil sa Cebu City.
Ang namatay giila ni SPO2 Allan Pantaleon sa Homicide Section sa Lapu-Lapu City Police Office (LLCPO) nga mao sila si Ricardo dela Torre Rafols, 32, taga Sitio Sta. Maria Pusok ug Jose Tukib Zabate, 33, taga Barangay Ibo, Dakbayan sa Lapu-Lapu.
Si Rafols naglingkod daplin sa karsada dihang gihunongan kini sa motorsiklo nga giluwanan og duha ka wala mailhing lalaki ug ang angkas mipaulan og bala kaniya nga nakaingon sa iyang kamatayon.
Kagahapon sa buntag gipusil usab si Zabate nga nagmaneho og motor anang higayona kuyog sa iyang asawa diha sa dalan M.L. Quezon Avenue sa Pajo. Ang mamumuno nag-angkas usab og laing motorsiklo. Si Zabate gikan pa mitambong sa hearing sa korte sa iyang kaso sa ilegal nga drugas. Ang insidente nakuha sa CCTV Camera.
Naangol usab sa laing pagpamusil ang 23- anyos nga lalaki nga si Bernie Mark Coronel human kini gipusil sa wa pa mailhing mamumuno diha sa sitio Centro, Alaska Mambaling, Dakbayan sa Sugbo kagahapon sa hapon.
Sumala pa sa hepe sa Mambaling Police Station nga si Chief Insp. Randy Caballes wa pa nila matumbok ang motibo ug kon kinsa ang mamumuno. (Rowena Capistrano ug Camille Pateres/IBM)(BANAT NEWS)
- Latest