Amahan sa kandidato gibanhigan

CEBU, Philippines — Grabeng naangol amahan sa nagpasubli nga kandidato sa pagka konsehal dihang kalit lang girakrakan  sa wala mailhi nga armadong mga lalaki diha sa dalan Lopez Jaena, Poblacion, Lapu-Lapu City kagahapon sa kaadlawon. Si Senior  Police Officer 1 Jeofrey Managase sa Presinto 3 sa Lapu-Lapu City Police Office  (LLCPO) miila sa biktima nga mao  si Eduardo  Godornez,  69, amahan ni kagawad James Godornez sa Poblacion nga nagpasubli sa iyang katungdanan.

Padung na mosud sa ilang balay ang biktima dihang gipusil, ang namusil misibat sakay sa motorsiklo. Ang biktima gidala sa pribadong tambalanan sa dakbayan sa Sugbo samtang padayon pa ang gihimong imbestigasyon sa nahitabo.

Sa laing bahin, balay ug sakyanan sa barangay kapitan sa barangay Bulak, lungsod sa Dumanjug girakrakan sa wa pa mailhing mga lalaki kagahapon sa kaadlawon.

Ang balay gipanag-iya ni incumbent Barangay Kapitan Reynaldo Albios ,51, nga nagpasubli alang sa iyang kataposang termino.

Sumala pa sa hepe sa Dumanjug Police Station nga si Senior Insp. Gilfred Baroman usa ka basiyo sa bala sa 9mm ug tulo ka deformed slugs ang ilang nakuha sa crime scene.

Giimbestigar pa sa kapolisan ang maong kaso ug gisubay kun kinsa ang nagpaluyo niini. (BANAT NEWS)