SK officials kinahanglang mag-training
CEBU, Philippines – Dili makalingkod ang usa ka opisyal sa Sanggunian Kabataan nga makadaog karong piniliay kon kini dili mopaubos og mandatory SK training.
Matod ni James Canoy ang pangulo sa Provincial Youth Commission (PYC) nga subay kini sa mandato sa RA 10742 o ang SK Reform Act.
Gikatakda nga mopahigayon og training sulod sa siyam ka adlaw ang PYC sa mga kabatan-unan nga modaog sa SK elections human sa piniliay.
Ipaubos sila sa pagkat-on sa lima ka modules nga mao ang paggama og resolusyon, pagsabot sa mga lagda ug responsibilidad sa usa ka SK member.
Gipaabot nga makat-unan usab nila ang parliamentary rules and procedures nga nalakip sa SK reform law.
Ang Provincial Youth Commission, National Youth Commission , Department of the Interior and Local Government (DILG), Local youth development officers, ug Liga ng mga Barangay adunay iumol nga management team nga maoy motan-aw sa maong training.
Matud ni Canoy makigtambayayong ang mga tunghaan sa Sugbo sama sa University of San Jose-Recoletos (USJ-R),University of San Carlos (USC) ug Cebu Institute of Technological-University (CIT-U) nga maoy magpahigayon sa training.
Ang mandato usab sa mga barangay mao ang paggahin og P2 mil matag SK member alang sa pag-apil sa maong training. Kon nagdumili ang barangay sa pagpagawas og pundo patubagon sila sa DILG. (/IBM)(BANAT NEWS)
- Latest
