Makapadayon paglansar ang mga kandidato bisa’g may depekto sa COC

CEBU, Philippines – Ang kadagkoan sa Comelec mitataw nga makapadayon gihapon pagpapili kadtong mga kandidato nga may kakulian sa ilang certificate of candidacy alang sa eleksiyon karong Mayo 14.

Matud ni provincial election supervisor Lionel Marco Castillano nga wala pa sila’y nadawat nga memorandum gikan sa Comelec en banc sa pag-disqualify sa 267 ka kandidato sa tibuok Sugbo nga may kakulian sa ilang COC.

Kasagaran sa adunay kakulian sa COC, mao kadtong midagan isip kandidato sa SK bisan og overage na, ang uban underage, ug ang uban sab dili rehistrado, o deactivated na ang ilang rehistro.

Matud ni Castillano nga kon makadaog ang maong mga kandidato anha na nga ang maong mga tawo mapasakaan og kaso aron tangtangon sa katungdanan tungod sa depekto sa ilang COC.

“Kanang petition to deny due course or cancel COC, in the first place void ang imong COC. It is as if you are not a candidate, so ang mahitabo ang kadtong number two maoy ma-proclaim later on,” matud ni Castillano.

Kon ugaling nga mapahawa sa pwesto, ang kontra nga adunay labing daghan og botos nga nakuha maoy mohulip kaniya.

Samtang nipahimangno usab ang Comelec sa mga kandidato sa ilang mga campaign posters karong hapit na ang campaign period alang sa umaabot nga piniliay.

Si Castillano nagkanayon nga ang maximum size sa tarpaulin, o posters 2 x 3 feet lang ug dili kini mahimong anha ibutang sa mga taytayan, poste, punoan sa kahoy ug alambre.

Ang tambag ni Castillano nga ang mga kandidato moadto sa Comelec offices aron mahibaw-an kon asa ang common poster area sa ilang barangay. Mahimo usab nga mapilitan og propaganda materials ang mga balay patigayon ug panimalay, kon adunay pagtugot sa tag-iya.

Kon adunay molapas nga kandidato, ang election officer mopadala kaniya og sulat aron ipatangtang ang poster.

“If he will not tear down, that will constitute prima facie evidence nga siya ang nagpabutang niana, picturan na namo kay that would be our basis para maka-file mi og kaso sa iya for violations of fair elections act,” matud ni Castillano. (/RUB)(BANAT NEWS)