Kapin P1 Milyon cash ug alahas nadala sa kawatan
CEBU, Philippines – Mokabat og kapin usa ka milyon sa kwarta ug alahas ang nakawat gikan sa usa ka duha ka andanang balay didto sa usa ka pribadong village sa barangay Tunghaan, sa lungsod sa Minglanilla niadtong Biyernes sa kaadlawon.
Matud pa ni SPO1 Oliver Dacua sa Minglanilla Police Station nga ala una sa kaadlawon nakamata ang tag-iya sa maong balay nga si Iñigo Briore Jr., 56, ug nadiskobrehan niini nga abli na ang walk-in closet sa ilang kwarto diin gibutang ang ilang mga alahas ug kwarta.
Giingong mokabat na sa P1, 096, 300 ang mga nakuhang mga alahas samtang P45 mil ang kwarta.
Sigon pa sa usa sa mga unang mirespondeng polis nga si PO2 Arnel Resente sa Banat News didto miagi ang kawatan sa sliding window sa kasilyas sa lawak sa magtiayong tag-iya.
“Pagmata sa mag-asawa kay abli na ang closet niya nabantayan nila ang mga managlahi-lahi nga pouch nga gibutangan sa mga alahas kay didto na sa bowl,” si Resente miingon.
Giingong nagpabutang og mga closed circuit television (CCTV) ang tag-iya sa tibuok balay ug giingong upat ka adlaw nga nagsulod-gawas sa maong balay ang mga nag set-up niini ug niadto lang Huwebes nahuman pagtaud. Apan sa dihang gisusi sa mga polis ang kuha sa CCTV, wala bisan usa sa mga camera ang nakakuha og footage sa kawatan.
Giingong ang bugtong nakuha sa maong CCTV mao ang likod sa kawatan nga nagsul-ob og hoodie jacket ug nagdala og backpack padung na gawas sa balay. Ang magtiayon 30 ka tuig nang residente sa maong lugar ug mao pa kini ang unang higayon nga sila gisaka og kawatan.
Ang mga polis nahibulong kay suhito sa balay ang maong kawatan sanglit kahibaw kini diin gibutang ang mahalong kabtangan. (Ermida Moradas/IBM)(BANAT NEWS)
- Latest