Kapolisan naglisud sa kaso ni Abella

CEBU, Philippines - Giangkon sa Cebu City Police Office nga naglisud pa sila sa pagsulbad sa kasong pagpusil patay kang barangay konsehal Neil Abella.

Kini gumikan kay gawas sa testimonya sa guwardya nga nakakita sa krimen, dili maklaro ang kuha sa closed-circuit television (CCTV) sa palibot niini.

Matud ni CCPO Director, Senior Supt. Joel Doria, nga base sa CCTV footage, dili maklaro ang panagway sa mamumuno ug wala pa sab matino kun unsa ang gihimong runaway vehicle hinungdan nga gipaningkamutan sa mga imbestigador nga makapangalap og dugang footages gikan sa mga duol nga establisemento.

Tug-an ni Doria nga aduna na silay person of interest nga maoy ilang gidudahang nagbuhat sa krimen apan matud pa nga dili pa kini mahimong ipahibawo sa publiko sanglit ila usa kini ipailawom og tumang imbestigasyon.

Ipahiling sab nila ang cellphone sa biktima aron masuta kun aduna ba kini nadawat nga mga hulga sa iyang kinabuhi kaniadto.

“Nasa politics din siya and at the same time nag-surrender siya baka may mga nakaaway din. Cooperative naman ang family. The family requested na hayaan muna na maayos yung libing,” matud ni Doria.

Si Abella konsehal sa Barangay San Isidro, Lungsod sa Pinamungajan diin usa siya sa gidudahang durugista sa maong lugar, sigun sa hepe sa kapolisan sa lungsod nga si Chief Inspector Adrian Nalua.

Si Doria niingon nga nakadawat sila og impormasyon nga kaniadto usa ka bagman sa usa ka drug lord si Abella.

Matud pa ni Nalua nga nitahan si Abella sa polis niadtong Nobiyembre 2016 ug nitug-an nga nakig-alayon kini sa Kampo Crame sa paghatag og detalye kabahin sa ilegal nga negosyo ug pagkahuman niini, talagsaon na lang kini mahimamat sa ilang lugar apan wala sab kini nisumbong nga nakadawat na kini og mga hulga sa iyang kinabuhi.

Gipusil patay ang konsehal sa parking lot sa usa ka burger stand sa may Mango Avenue, Dakbayan sa Sugbo niadtong Abril 13 sa kaadlawon samtang nag-backing kini sa iyang sakyanan aron unta mobiya na sa maong lugar.

Namatay diha-diha si Abella samtang nanga-angol ang kauban niini sa maong sakyanan nga silang Enriclint Alesna, 41, ug Mabel Noel, 43-anyos. (/GMR)(BANAT NEWS)