Scholarship program gibuksan pagbalik

CEBU, Philippines - Gipahibawo sa kagamhanan sa Dakbayan sa Sugbo nga manawat na sila og balik og scholars human sa duha ka tuig nga pagkahunong niini.

Gibutyag ni Konsehal Joy Augustus Young, deputy mayor for education matters, nga magsugod ang aptitude test sa liboan ka graduates sa Senior High School karong Abril 23 hangtud Mayo 7 nga dumalahon sa usa ka private testing center.

Ang kagamhanan sa siyudad nigahin og kapin sa P200 milyones alang niini. Sa pagkakaron ang siyudad adunay 7,250 ka scholars sa kapin 20 ka tunghaan nga accredited sa siyudad. 

“Karong tuiga is a game changer kay mausab ang figure tungod sa Senior High School ug Free Tuition Law,” matud ni Young.

Ang City Scholarship Committee modawat og mga graduates sa high school gikan sa 2010 paubos ug mahimo sila maka-eskwela og usab kadtong mga scholars kaniadto nga wala katiwas sa pagtungha apan gusto motungha sa kolehiyo. 

Mohatag ang kagamhanan sa siyudad og P10,000 alang sa tuition fee matag semester, P1,000 sa school supplies ug laing P10,000 matag buwan sa mga scholars nga residente sa kabukiran. (CNU Intern/GMR)(BANAT NEWS)