Upat ka polis nagsumbagay
CEBU, Philippines — Upat ka mga polis nga sakop sa Mabolo Police Station sa Cebu City Police Office ang gikatahong nag-unay og sumbagay samtang sila namista didto sa Barangay Tayud, Lungsod sa Consolacion alas-8 pasado ang takna sa miaging gabii.
Si Police Officer 2 Jorge Tapales sa Consolacion Police Station miingon nga nakadawat sila og report bahin sa nagkasinumbagay nga mga lalaki sa maong dapit maong dali silang miresponde didto.
Didto ilang nasayran nga ang nagkaaway mao sila si PO1 Marlon Cabado, PO1 Fernan Omolon, PO2 Alfred Talaboc kinsa daling nakasibat samtang ang usa nga nahibilin mao si PO3 Joel Pedoche Vergara.
Dugang pa ni PO2 Tapales nga sila si PO3 Cris Lawian ug mga kauban maoy nakatubag sa alarma. Gikataho nga pista sa maong lugar mao nga daghang mga tawo nga namista apil na ang maong mga polis.
Base sa nakuha nilang impormasyon, nag-inom ang maong mga polis ug dihang nangahubog kalit lamang usab nga nahitabo ang panaglalis nga misangko sa pagsinumbagay.
Si PO2 Tapales miingon nga si Inspector Samson Go nga maoy deputy chief sa Mabolo Police Station daling miabot sa lugar ug didto gitugyan kaniya ang pag-imbestigar sa ilang mga sakop.
Apan si Cebu City Police Office Director Senior Supt. Joel Doria wala mahimuot sa taras sa iyang mga sakop kay matud niya kinahanglan unta nga sila disiplinado may duty man o wala.
"Puro pulis yan. They should behave in a manner na talagang they're fitting as a police officer. Kailangan ‘yung discipline andiyan pa rin," si Doria miingon.
Gimandoan ni Doria ang hepe sa Mabolo Police Station nga si Chief Insp. Clark Ariola paimbestigaran ang maong insidente aron masuta kon kinsa ba ang angay nga manubag ug angay nga mapasakaan og kasong administratiba.
Samtang gipa-monitor ni Doria ang Investigation, Detection and Management Branch sa pagahimuong imbestigasyon.
Si Ariola sa iyang bahin mibutyag nga kasamtangan pa niyang gipa-explain ang mga nalambigit nga polis.
"Once madawat ang explanations, naay himuong concrete nga estorya para naay conclusions mahimo," sigun pa sa maong hepe. — Camille Pateres (BANAT NEWS)
- Latest