Militante nagmartsa kontra Duterte

CEBU, Philippines — Nagmartsa ang nagkadaiyang cause oriented groups nga gipangulohan sa Cebu Citizens’ Assembly nga mipahigayon og lihok protesta sa downtown Cebu City aron ipakita ilang pagsupak sa mga palisiyang gustong ipatuman sa gobiyerno aron sa pagtimaan sa 32nd anniversary sa EDSA People Power Revolution.

Si Aubrey John Ampo-on, usa sa mga organizers nga anaa sa Akbayan Youth, miingon nga ang maong protesta pagpakita sa ilang pagsupak sa plano sa gobiyerno nga usbon ang Konstitusyon ug paglusad sa Charter Change aron maduso ang pederalismo. Ang tema sa kalihokan gibansagang “Ang Matag Hagit sa Sugbuanon.”

“Naa’y mas dakong hagit na mawagtang na sad ang demokrasya ug mobalik na pud sa mangitngit na panahon parehas sa Martial Law ni Marcos,” matud ni Ampo-on.

Si kanhi presidente Ferdinand Marcos napalagpot sa katungdanan human ang katawhan mi-alsa nga gitawag karong People Power Revolution.

Dugang ni Ampo-on, pinaagi sa Charter Change makahimo ang gobiyerno og bag-ong Konstitusyon ug makahatag kini ni Presidente Rodrigo Duterte og igong gahum nga mamahimong diktador nga pamuno.

Gisaway usab nila ang Republic Act 10963 o ang Tax Reform for Acceleration and Inclusion (TRAIN) law nga sa ilang tan-aw makapasamot sa kalisod sa mga kabus ug ang mga dato mosamot og ka adunahan.

Ang lokal nga lihok protesta gisuportahan usab sa Akbayan partylist, Akbayan Youth, Partido Manggagawa, The Silent Majority, Tindig Pilipina, Pagtambayayong Foundation, Kaabag sa Sugbo, Tindig Pilipinas, Kilusan para sa Pambasang Demokrasya (Kilusan-Cebu), The Silent Majority (TSM), National Confederation for Transport Workers’ Union (NCTU), Cebu for Human Rights (C4HR) ug uban pa.

Sila nagmartsa gikan sa Sto. Rosario Church paingon ngadto sa atubangan sa Metro Colon diin sila nag- rally. Bitbit nila ang mga nagkadaiyang mga plakards sama sa No to ChaCha, No to Dictatorship, No to Federalism ug uban pa.

Si Emalyn Aliviano, representate sa Kilusan-Cebu mitataw nga dili kini politically motivated ug namugna kining maong rally aron ipadangat ang ilahang mga reklamo tungod kay wala sila makauyon sa pamaagi ni Duterte ug kini kabahin sa ilang lakang sa pag-edukar ug pagpahibalo sa mga tawo.

Nagkanayon si NCTU Visayas Coordinator Angie Mata, nanawagan sila sa mga kaubanang drayber ug mga operators nga batukan ang PUJ Modernization Program kon magkahulogan kini nga makulban sila og kaldero kay wala sila makapangandam.

Si Atty. Joy Pojanes, representante sa Cebu for Human Rights miingon nga gikinahanglan ang respeto sa tawhanung katungod kay bisan kadtong mga kriminal adunay katungod nga ipaagi sa due process. (BANAT NEWS)