Siyudad magdaginot sa Charter Day
CEBU, Philippines — Simple ug menus gastos unya ang pagselebrar sa siyudad sa Sugbo sa 81st Charter Day karong Pebrero 24 ning tuiga.
Nagkanayon si Cebu City Mayor Tomas Osmeña gamay ra ang selebrasyon aron makadaginot sa kwarta ang siyudad.
Matud niya dili ra molapas og P1 milyon ang gastuhon sa Charter Day itandi sa gigasto sa siyudad sa panahon ni kanhi mayor Michael Rama nga giingong migasto og P14 milyones sa Charter Day.
“Ako bisa’g siopao, meat roll ug fruit juice okay na para kanako,” sigon ni Osmeña.
Ang Charter Day Celebration karong adlaw’ng Sabado buksan sa usa ka Santos nga Misa ug programa nga pasiugdahan sa Cebu City Cultural and Historical Commission (CHAC) diin pipila ka mga City Hall employees ang pasidunggan tungod sa ilang exemplary attitude sa paghatag og serbisyo sa publiko.
Sa alas 5 sa hapon usa ka testimonial dinner ang ipahigayon sa Waterfront Hotel ug isunod dayon ang awarding ceremony alang sa Outstanding Individual, Institutions, Posthumous Award ug Mayor’s Special Award.
Ang CHAC milusad sa Arts Week nga kabahin sa mga kalihokan sa Charter Day Celebration diin gi -exhibit ang mga art works sa mga Cebuano artists diha sa Cuerpo de Guardia sa Fort San Pedro. (BANAT NEWS)
- Latest