PO1 sasing gilubong na
Si PO1 Mae Sasing gihatud na sa iyang pahulayanang dayon sa Manila Memorial Park sa Lungsod sa Liloan kagahapon sa hapon sa iyang kabanay ug mga kauban sa serbisyo sa kapolisan.Christell Fatima M. Tudtud/GMR
CEBU, Philippines — Gihatud na sa kapahulayang dayon ang patay’ng lawas ni Police Officer 1 Mae Sasing sa Manila Memorial Park sa Lungsod sa Liloan kagahapon sa hapon.
Gawas sa pamilya, mga kauban sa trabaho ni Sasing ang niduyog sa kasub-anan sa pamilya ug pulos niingon nga dakong kawad-on sa ilang organisasyon ang kamatayon ni Sasing kinsa ilang mahinumduman nga mapahiyumon ug komedyante.
Si Chief Inspector Francisco Villanueva, hepe sa City Public Safety Company sa Lapu-Lapu City Police Office (LLCPO), usa sa mga nihatud sa lubong ni Sasing, nagkanayon nga dakong kawad-on sa iyang unit si Sasing.
“PO1 Sasing being a member of CPSC, ako being a commander, medyo nakuhaan ko’g personnel na motrabaho gyud sa (iyahang) responsibility, and she is one good police officer nga jolly. Everyday, makakita gyud ka nga smiling siya. I’m very thankful nga naa siya nako because she is doing good,” matud ni Villanueva.
Samtang si PO2 Ryan Diamada, bayaw ni Sasing, nitataw sab nga isalig nila sa kapolisan ang imbestigasyon sa pagkasikop sa kanhi uyab niini nga si Felix Taytayan.
Ang inahan ni Sasing nga si Virgie niingon nga magsalig sila sa imbestigasyon sa kapolisan alang sa pagpalakaw sa hustisya.
Unang gimisahan ang patay’ng lawas ni Sasing sa San Roque Parish sa maong lungsod sa wala pa kini gidala sa sementeryo.
Si Sasing gipusil sa niaging Oktubre 31 sa Basak, Dakbayan sa Mandaue samtang padulong pauli sa balay niini sa Jugan, Lungsod sa Consolacion.
Nobiyembre 3 nasikop sa kapolisan ang suspek nga si Taytayan sa Lungsod sa Madridejos, Isla sa Bantayan ug gipasakaan og kasong murder sa kapolisan.
Gawas ni Taytayan, ang kauban niini nga drayber sa motor sa pagpusil ni Sasing ang gikasuhan sab og kasong murder ug padayon pa nga gipangita sa kapolisan. - /GMR) (BANAT NEWS)
- Latest
