Canopy sa building nahugno

CEBU, Philippines - Nahugno ang canopy sa gitukod nga building sa Lite Shipping Corporation sa may MJ Cuenco Avenue, Carreta, Dakbayan sa Sugbo pasado alas 4 kagahapon sa buntag.

Si Police Officer 2 Jennifer Pal Torregosa, desk officer, sa Waterfront Police Station, nibutyag nga walay gipasulod sa responding team ug sa disaster team sa siyudad tungod sa palisiya sa kompaniya.

Si Konsehal Dave Tumulak, deputy mayor on police matter, nitug-an nga alas 12 sa tungang gabii nagbuhos og semento sa building ang mga trabahante ug gituohang tungod sa kabug-at nibigay ang canopy sa ikapitong andana diin tulo ang naangol.

Matud ni Tumulak nga ang kompaniya adunay tulubagon maong iya na gimanduan ang Office of the Building Official (OBO) nga susihon ang katukuran sa maong building.

“Mandatory man na nga if there is coming from the city government, ila gyud pasudlon. And that is the responsibility of our safety engineer. That is why ang akong instruction ganina, look for the safety engineer kay siya maoy nahibaw what to do," matud ni Engr. Josefa Ylanan, ang pangulo sa OBO.

Matud ni Ylanan nga gi-hold pa ang permit sa building tungod kay duna pay mga dokumento nga wala maduso ang mga engineers apan nagpadayon ang trabaho niini.

Si Tumulak nidason nga nakalapas sa Employer’s Welfare Act ang kontraktor lakip na ang tag-iya sa building gumikan sa matud pa wala dayon pagpasulod sa mga emergency responders.

Gimanduan sa OBO ang kontraktor sa building nga mohatag og eksplinasyon sa wala dayon pagpasulod sa disaster team nga niresponde sa hitabo.

Samtang giluwatan na kagahapon ang work stoppage order sa nahugno nga building. Ang DOLE-7 niluwat sa work stoppage order ngadto sa contractor nga Devlarn Venture.

Matud ni Lilia Estillore, ang pangulo sa sa Tri-City Field Office, nga ang canopy nga gihimo nga extension sa ikapitong andana ang nahugno ug dili ang scaffolding.

Matud ni Estillore nga nagbuhos og semento sa atop sa canopy ang mga trabahante dihang nahugno.

"Nakaambak ra man pud dayon ang upat ka construction workers sa main floor sa seventh floor sa dihang ila nang namatikdan nga mohugno na," matud ni Estillore.

Tulo ka trabahante ang nakaangkon og minor injuries.

Sutaon sa mga imbestigador sa DOLE-7 kung importante ba gyud ang canopy kay kung dili, ipatangtang na lang kini.

Adunay mandatory conference nga ipahigayon karon ang DOLE-7 ug ang kontractor alang sa pagsuta sa nahitabo ingon man ang posibilidad nga buhaton aron malibkas ang work stoppage order. Rowena D. Capistrano; Zeny L. Tapuyao ug Darlene A. Teves, CNU Interns; Decemay P. Padilla ug Mitchelle L. Palaubsanon (BANAT NEWS)