3 gipamusil patay

CEBU, Philippines - Upat ka tawo ang gipamusil niadtong Sabado sa gabii sa managlahing higayon ug lugar.

Gipamusil samtang nangatulog ang duha ka dispatser sa Barangay Tabunok, Siyudad sa Talisay. 

Patay diha-diha si Derrick Bacus alyas Negro nga taga Sitio Crusher sa Brgy. Lawaan III kinsa nakaangkon og tulo ka samad pinusilan sa iyang lawas. Samtang nadala sa tambalanan ang iyang kauban nga si Oliver Tabay alyas Jomong nga taga Sitio Molave, Brgy Tabunok.

Ang nagpusil sa mga biktima nailhan nga si Marlon Montellano, usa ka tindero og prutas nga taga Lungsod sa Minglanilla.

Matud ni SPO2 Yvonne Illustrisimo sa Talisay City Police nga nasuko ang suspek ngadto kang Bacus kay kanunay kining sungogon nga bati og nawong.

Giingong samtang nangatulog sa gawas sa usa ka tindahan sila si Bacus ug Tabay, nakahigayon si Montellano nga pusilon si Bacus, apan nakamata si Tabay hinungdan nga giapil kini niya og pusil apan kausa ra. Mipahigayon og hot pursuit operation ang kapolisan aron masikop si Montellano.

Duha ka wa mailhing lalaki ang patay sa pagpamusil sab sa Brgy Langtad sa Siyudad sa Naga. Gibana-bana sa kapolisan nga adunay gitas-on nga 5’4 ang duha. Ang usa kanila nagsul-ob og green nga t-shirt ug gray nga shorts samtang ang usa, nagsu-ob og itom nga t-shirt ug blue nga karsones.

Giingong nag-istambay ang mga biktima sa Sitio Mohon apan kalit lang silang gipusil sa duha ka lalaki nga nagsul-ob og bonnet samtang nagsakay og motorsiklo.

Buto-buto sa armas maoy nadunggan sa mga residente sa lugar ug dihang ilang gisusi ang gigikanan niini, ilang nakit-an ang duha ka biktima nga naligo na sa ilang kaugalingong dugo ug daghang samad pinusilan.

Matud ni PSupt. Gregorio Galsim, hepe sa Naga City Police nga ilang gipakita sa mga residente ug sa kapitan sa maong barangay ang hulagway sa mga biktima apan wala’y nakaila kanila. Hinungdan nga ilang duda, dili taga Naga ang mga biktima. Camille L. Pateres uban nila ni Zeny L. Tapuyao ug Darlene A. Teves (BANAT NEWS)